Foto: DBV
Beeste in die droogtegeteisterde gebied van Matiane in Limpopo het inentings teen bek-en-klouseer begin kry.
Nagenoeg 4 000 beeste is reeds teen dié virus ingeënt. “Ons hoop om 6 070 beeste in te ent,” het Bomikazi Molapo, woordvoerder van die nasionale departement van landbou, bosbou en vissery, gesê.
Minister Senzeni Zokwana het dié gebied verlede week besoek ná die uitbreek van die epidemie sigbaar geraak het. “Ons het lede van die gemeenskap ingelig oor die epidemie asook oor maatreëls wat getref kan word om dit effektief te bestuur,” het Molapo gesê.
Volgens Molapo is daar 14 beeste wat reeds tekens toon dat hulle bek-en-klouseer onder lede het. “Daar is 1 200 beeste wat ook die risiko van besmetting loop.”