[Foto’s] Duisende ruk op teen Zuma

Duisende mense het onderskeidelik in Pretoria, Johannesburg en Kaapstad bymekaargekom in optogte teen pres. Jacob Zuma.

Die #ZumaMustFall-beweging het verlede week momentum begin kry nadat Zuma vir Nhlanhla Nene, minister van finansies, die trekpas gegee het. David van Rooyen is in sy plek aangestel. Zuma het egter kort hierna Van Rooyen vervang met Pravin Gordhan, ʼn voormalige minister van finansies.

Verskeie optogte is hierna onder die vaandel van #ZumaMustFall gereël. In Pretoria was daar sedert Woensdagoggend vroeg ʼn streng polisieteenwoordigheid by die Uniegebou. Die optog het om 09:00 by die Kunsmuseum in Arcadia begin waarna optoggangers na die Unigebou sal beweeg en na verwagting tot 15:00 met die optog sal voortgaan.

In Johannesburg het mense aan die Braamfontein-kant van die Nelson Mandela-brug begin byeenkom. Die organiseerders van die Johannesburg-optog, die organisasie Section27, het intussen gesê die optog sal bekendstaan as “Geen versoening met korrupsie”. Die Johannesburgse metropolisie sal intussen die verkeer monitor.

In Kaapstad het optoggangers sedert 08:00 voor die parlement bymekaargekom. Die optog sal na verwagting teen 10:00 se kant na die Kompanjietuin beweeg waar eerw. Mpho Tutu, aartsbiskop Desmond Tutu se dogter, na verwagting optoggangers sal toespreek.