Die Grove Mall in die ooste van Pretoria is Dinsdagaand ontruim weens ʼn bomdreigement.
Pierre Botha, woordvoerder van die winkelsentrum, het gesê hulle het Dinsdagmiddag laat die bomdreigement ontvang waarna die polisie se bomeenheid ontbied en die winkelsentrum ontruim is.
Volgens Botha was polisiebeamptes nog teen 19:00 op die toneel om die sentrum te fynkam. “Indien daar bevind word dat daar niks fout is nie sal ons van die restaurante weer oopmaak. Ons wil graag ons klante bedank vir hul samewerking en hulle verseker dat hul veiligheid ons prioriteit is.”
Die sentrum is in Julie vanjaar ook ontruim weens ʼn bomdreigement.