Foto: ANA
ʼn Motoris het vroeg Sondagoggend by ʼn vulstasie in Durban ingejaag nadat hy vermoedelik beheer oor sy motor verloor het.
Kyle van Reenen, woordvoerder van Crisis Medical ambulansdienste, het gesê die voorval het in North Coast-weg gebeur. Die man en ʼn passasier is beseer toe die motor teen een van die verkeerseilande in die vulstasie gebots het.
“Dit is nie duidelik wat die ongeluk veroorsaak het nie, maar omstanders het getuig hoe die motor skielik by die vulstasie ingejaag gekom het en teen die eiland tot stilstand gekom het,” het Van Reenen gesê. “Die bestuurder én sy passasier is beseer en albei is op die toneel gestabiliseer voordat hulle na ʼn nabygeleë hospitaal vervoer is.”
Volgens Van Reenen was die plaaslike owerhede op die toneel om die ongeluk te ondersoek.