Julius Malema, leier van die Ekonomiese Vryheidsvegters (EFF) Foto: enca.com
Die Nasionale Vervolgingsgesag (NVG) het Dinsdag gesê aanklagte van korrupsie en swendelary kan weer teen Julius Malema en sy twee medebeskuldigdes ingestel word.
“Dit is nie ʼn vryspraak nie, dit is ook nie ʼn uitspraak nie, soos die regter gestipuleer het,” het Luvuyo Mfaku, woordvoerder van die NVG, gesê. “Die saak is slegs van die rol geskrap. Die moontlikheid bestaan dat die direktoraat van openbare vervolging genader kan word om ʼn sertifikaat uit te reik om die saak weer in te stel.”
Hy kon egter nie aandui wanneer die saak weer ingestel sal word nie.
Regter George Motlhe het Dinsdag gesê die saak sloer te lank en dit benadeel die beskuldigdes wat in die hof is en gereed is om voort te gaan. Hy het gelas dat die beskuldigdes se borgtoggeld ook aan hulle terugbetaal moet word.
Die saak sloer al sedert 2012 toe die drie persone in hegtenis geneem en aangekla is. Malema is vrygelaat op borgtog van R10 000 en Lesiba Gwangwa en Kagiso Dichabe is vrygelaat op borgtog van R40 000 elk. Hulle staan tereg op meer as 50 aanklagte van korrupsie en swendelary. Dichabe was nie in die hof nie. Die hof het gehoor hy ly aan depressie en sy regspan het ʼn aansoek ingedien dat die saak uitgestel word.
Malema wil egter afsonderlik verhoor word, “om te verhoed dat geregtigheid vertraag word”. Die staat het Malema se aansoek teengestaan.
Die staat voer aan Malema se Ratanang-familietrust het voordeel getrek uit ʼn onregmatige tender aan On Point Engineering.
Malema, Gwangwa en Dichabe is beskuldig van onreëlmatighede en dat hulle ʼn wanvoorstel van hulself gemaak het aan die departement van paaie en vervoer in Limpopo wat die tender van R52 miljoen aan die maatskappy toegeken het.
Lees alle vorige berigte oor Julius Malema op Maroela Media.