Absa het bevestig dat hy sy borgskap van die program Our Perfect Wedding met onmiddellike effek beëindig het nadat daar ook ʼn klag by die Uitsaaiklagtekommissie ingedien is.
Die spesifieke episode van die program is Sondagaand op Mzansi Magic, kanaal 161 op DStv, uitgesaai. Volgens EWN is daar in die episode verwys na ʼn jong vrou wat haar man ontmoet het toe sy 14 jaar oud was en hy 29. Die man het glo ook erken dat hy skoolmeisies vir seks geteiken het.
Mzansi Magic het in ʼn verklaring gesê hy neem kennis van kykers se besware rakende die episode. “Die uitgangspunt van die program is om die liefde en reis wat paartjies onderneem tot hul troudag te vier. Ons werklikheidsreeks weerspieël die samelewing soos dit is. In die geval van die spesifieke episode het die paartjie se verlede ongemaklike maatskaplike kwessies aan die lig gebring. Met die familie en gemeenskap wat aanvanklik teen die verhouding was, moes hulle ʼn manier vind om dit op te los.”
Mazansi Magic het aangedui dat die spesifieke episode nie weer uitgesaai sal word nie. Absa het intussen bevestig dat hy sy borgskap van die program met onmiddellike effek opgeskort het.