Argieffoto
Die Suid-Afrikaanse Rooibosraad het Vrydag teedrinkers gerus gestel dat hulle nie paniekerig hoef te wees en voorraad hoef op te bou van dié kruietee nie.
Die raad het reageer ná berigte vandeesweek dat die prys van rooibos met 90% kan styg, aangesien die 2016 oes moontlik die slegste ooit sal wees weens die droogte.
Ernest du Toit, woordvoerder van die raad, het gesê ʼn prysverhoging van 90% is uiters onwaarskynlik. “Die vervaardigingsiklus van rooibos strek oor vier jaar en ʼn prysverhoging sal geleidelik wees, net soos die geval met ander voedselprodukte in die Suid-Afrikaanse mark,” het hy gesê. “ʼn Prysverhoging sal dus mettertyd gevoel word, en dit sal nie onmiddellik of in die korttermyn plaasvind nie.”
Hy het bygevoeg indien daar verligting kom tydens die droogte in die vervaardigingsperiode, sal boere hul belegging in die oes kan vermeerder.
Die Cederberg, Bokkeveld en ander streke van die Wes- en Noord-Kaap waar die plant groei, het min of geen reën gehad nie tydens die saaityd in Julie en Augustus.
Die raad is ʼn selfgereguleerde vereniging vir die rooibosbedryf en is gevestig om seker te maak dat etiese praktyke gevolg word.