Jasmin se moordenaar sit lank

Die vierjarige Jasmin Lee Pretorius se moordenaar en verkragter, haar oom, Sarel du Toit (25), is Vrydag in die hooggeregshof in Pretoria gevonnis.

Volgens eNuus het regter Mahomed Ismail Du Toit tot twee keer lewenslange tronkstraf gevonnis op aanklagte van moord en verkragting. Die vonnisse sal gelyklopend uitgedien word. Ismail het tydens vonnisoplegging gesê Du Toit se aksies het ʼn rimpeleffek op talle mense se lewens gehad. Hy het gesê Du Toit se aksies was boos en dat hy ʼn onskuldige kind aan erge pyn onderwerp het.

Du Toit het vroeër die week erken dat hy Jasmin op 28 Desember 2013 in ’n woonstel in Brakpan verkrag en vermoor het. Jasmin se liggaam is later onder ʼn bed in haar pa se huis aangetref nadat sy as vermis aangemeld is. Du Toit is kort daarna vir die moord in hegtenis geneem.

Jasmin se ma het intussen ʼn ope brief oor haar dogter op sosiale media gedeel. Klik hier om meer te lees.

Klik hier vir alle vorige berigte oor Jasmin Lee Pretorius op Maroela Media.