Argieffoto
Twee mans is Woensdag in afsonderlike gevalle in KwaZulu-Natal deur vuurwerk beseer.
Robert McKenzie, woordvoerder van die provinsie se nooddienste, het gesê in die eerste voorval het paramedici ʼn oproep ontvang dat ʼn man brand- en skeurwonde aan sy kop in die Newlands-Wes-omgewing opgedoen het.
“ʼn Ambulans is na die toneel gestuur. Toe paramedici egter by die toneel opdaag is hulle meegedeel dat die man, vermoedelik 33 jaar oud, deur iemand anders na ʼn hospitaal geneem is,” het McKenzie gesê.
In die tweede voorval is ʼn 29-jargie man van Illovo beseer nadat ʼn projektiel van ʼn vuurwerk hom teen die oor getref het.
“Hy was in ʼn stabiele toestand by die paramedici se aankoms. Hy is op die toneel behandel en na ʼn hospitaal geneem vir waarneming.”
Intussen is ʼn kamer met die volledige inhoud in Pietermaritzburg deur ʼn brand verwoes. “Die brand is glo veroorsaak deur die nalatige gebruik van vuurwerk,” het McKenzie bygevoeg.
Niemand is in dié voorval beseer nie.