Argieffoto Foto: SAPD, Facebook
ʼn Polisiebeampte van Port Elizabeth is Donderdagoggend by haar huis doodgeskiet nadat sy nagskof gewerk het.
Kol. Sibongile Soci, Oos-Kaapse polisiewoordvoerder, het gesê die beampte, konst. Nomathamsanqa Ivy Tsitsi (36), was by die Zwide-polisiestasie gevestig en was tien jaar lank in die polisie.
“Sy het omstreeks 06:00 van diens af gekom en skaars by haar huis in Motherwell opgedaag toe sy deur ʼn onbekende man genader is. Hy het op haar losgebrand terwyl sy in haar private motor, ʼn swart Citroën, gesit het. Sy is in die bolyf getref en is op die toneel dood,” het Soci gesê.
Die motief vir haar moord is nog nie bekend nie en die Motherwell-polisie ondersoek ʼn saak van moord. Niemand is nog in verband met die voorval in hegtenis geneem nie.
Lt.genl. Celiwe Binta, provinsiale polisiekommissaris, het namens die polisie meegevoel aan Tsitsi se familie, vriende en kollegas betuig.
“Ons veroordeel die moord ten sterkste en sal onverpoosd werk om te verseker dat diegene wat nie twee keer dink om ʼn polisiebeampte te vermoor nie, vervolg word. Die polisie sal die nodige ondersteuning aan konst. Tsitsi se familie verskaf gedurende hierdie moeilike tyd,” het Binta gesê.