Die voorblad van die Sunday Times van 19 April 2015 met foto’s van die aanval op Emmanuel Sithole. Die foto’s is deur James Oatway geneem. Foto: http://www.thepaperboy.com/
Twee van die vier mans wat tereg gestaan het op aanklag van die moord op die Mosambieker Emmanuel Josias Sithole, is skuldig bevind.
Sithole is op 18 April vanjaar dood nadat hy geld van die beskuldigdes geëis het, nadat hulle sigarette en lekkergoed uit sy stalletjie gevat het sonder om te betaal. Die aanval het tydens ʼn vlaag xenofobiese aanvalle in Alexandra, Johannesburg, plaasgevind en James Oatway, ʼn fotograaf vir Sunday Times, het dit op ʼn foto vasgevang.
Mhinto Bhengu (22)‚ Sizwe Mngomezulu (20)‚ Sifundo Mzimela (21)‚ en ʼn 17-jarige seun het in die Johannesburgse landdroshof skuld ontken op aanklag van diefstal en moord.
Landdros Lucas van der Schyff het Woensdag Mngomezulu ontslaan, nadat die landdros bevind het dat hy slegs ʼn omstander was toe die aanval plaasgevind het.
Van der Schyff het Vrydag in sy uitspraak gesê hy is tevrede dat die staat bo redelike twyfel bewys het dat Mzimela die slagoffer met ʼn stuk gereedskap gedreig het. Hy kan egter nie bevind dat Mzimela hom wel daarmee aangerand het nie.
Hy het Mzimela en Bhengu tog skuldig bevind aan moord, en gesê hulle het met ʼn gemene doel opgetree om Sithole te vermoor.
Van der Schyff het gesê hy kan nie die tiener skuldig bevind aan moord nie, aangesien hy eers opgedaag het nadat Sithole gesteek is. Hy het bevind dat die minderjarige wel ten doel gehad het om Sithole met ʼn skerp voorwerp te steek, maar ʼn omstander het hom gekeer.
Die landdros het die drie mans vrygespreek op aanklag van roof met verswarende omstandighede, maar die tiener is skuldig bevind op aanklag van diefstal van die sigarette en lekkergoed uit die stalletjie. Hy het die tiener ook skuldig bevind op aanklag van aanranding.
Die tiener se ma het buite die hof om verskoning gevra vir haar seun se gedrag. Sy het gesê sy voel die pyn wat Sithole se familie oor sy moord deurgaan.
Die saak is tot volgende maand uitgestel vir vonnisoplegging.
Lees alle vorige berigte oor Emmanuel Sithole op Maroela Media.