Hof beslis dat presidensiële handboek openbaar gemaak moet word

Die hooggeregshof in Pretoria het vandag ná ’n uitgerekte regstryd tussen AfriForum en die presidensie beslis dat die omstrede presidensiële handboek openbaar gemaak moet word.

Werner Human, AfriForum se regsverteenwoordiger wat aan die firma Hurter Spies Ingelyf verbonde is, het gesê die handboek moet ook voor óf op 30 November 2015 aan AfriForum voorsien word. Dié dokument bevat die reëls vir die gebruik van openbare fondse om enige vermaak-, verblyf- en reiskoste van die president en adjunkpresident te betaal. AfriForum het ook met ’n kostebevel geslaag, wat die koste van twee advokate insluit.

AfriForum het die hofaansoek in openbare belang ingedien om die reëls vas te stel wat vir presidensielede se privaat vakansies op staatskoste geld.

Die regstryd duur sedert Desember 2012 toe Kgalema Motlanthe, die destydse adjunkpresident, ’n vakansie van ongeveer R2 miljoen op die Seychelle-eilandgroep gaan hou het waarvoor die belastingbetaler moes betaal. Dit het gebeur kort nadat Motlanthe in die ANC-leiersverkiesing deur pres. Jacob Zuma geklop is. Zuma het ook in dié tydperk op die Bazaruto-eiland buite Mosambiek vakansie gaan hou, waarvoor die belastingbetaler ongeveer R1,6 miljoen moes opdok.

Nadat die adjunkpresident se woordvoerder verduidelik het dat die presidensiële handboek sulke duur vakansies op staatskoste vir lede van die presidensie toelaat, het AfriForum ’n afskrif van die handboek kragtens die Wet op Bevordering van Toegang tot Inligting versoek. Die versoek is egter deur die presidensie geweier.

“Wat verblydend is, is dat dié saak die voltooiing van die presidensiële handboek nou tot ’n punt dwing. Die handboek is sedert 2007 in ontwerpstadium en die voltooiing daarvan het sedertdien gesloer,” het Human gesê.

“Die publiek het ’n belang om te weet hoe belastinggeld aangewend word, veral deur die hoogste regeringsvlak en veral waar uitgawes vir privaat doeleindes aangegaan en deur die staat gefinansier word,” het Human bygevoeg.

Dit het ook aan die lig gekom dat die kabinet in 2007 reeds ’n beleid aanvaar het wat moes geld terwyl die presidensiële handboek nog in konsepvorm is. AfriForum gaan die stryd voortsit en opnuut ’n versoek aan die presidensie rig om dié beleid in terme van die Wet op Bevordering van Toegang tot Inligting te ontvang. AfriForum is bereid om die stryd tot die einde toe te voer.

Sou die presidensiële handboek nie teen 30 November 2015 aan AfriForum beskikbaar gestel word nie, sal AfriForum ’n grondige beweegrede hê om ’n aansoek om minagting in te dien.