Jaydon en Nadia Venter.
Die ma en haar tweejarige seuntjie van Germiston aan die Oos-Rand wat op 14 Oktober spoorloos verdwyn het, is spoedig opgespoor nadat inligting oor hul verdwyning bekend gemaak is.
Dessie Rechner, stigter en direkteur van Pink Ladies, ʼn organisasie wat hom daarop toespits om vermiste mense op te spoor, het vandeesweek pamflette van Nadia (22) en Jaydon Venter (2) versprei in die hoop dat iemand hulle sal herken en die Alberton-polisie in hul ondersoek kan bystaan.
Maroela Media het Dinsdag berig Jaydon en sy ma woon saam in Elspark. Hulle is die laaste keer saam in Edenvale gesien. Nadia se ma het hulle as vermis aangemeld nadat sy Nadia nie kon opspoor nie.
Rechner het Woensdag aan Maroela Media gesê Nadia en Jaydon is saam opgespoor en is veilig en ongedeerd. “Die polisie het hul ondersoek afgehandel en die saak is gesluit. Ons wil almal bedank wat inligting oor die ma en kind versprei het. Dit het beslis bygedra om die ondersoek op te los,” het Rechner gesê.
Volgens Rechner kan daar weens die aard van die saak nie verdere inligting bekend gemaak word nie.