Polisie vra hulp ná lyk in Hermanus gevind is

Die polisie in Hermanus het die hulp van die publiek gevra om ʼn man te identifiseer nadat sy liggaam in vlak seewater by die Whale Rock-landgoed in Hermanus gevind is.

Konst. Noloyiso Rwexana, woordvoerder van die polisie, het gesê die polisie is Sondag omstreeks 13:30 na die Whale Rock-landgoed ontbied waar die man se liggaam in die see gevind is. “Die oorledene het ʼn swart broek en donker trui aangehad. Hy is groot gebou en het tatoeëermerke op sy bors.”

Volgens Rwexana was die man ongeveer 30 jaar oud. ʼn Geregtelike doodsondersoek is geopen en enigiemand met inligting kan konst. Craig Philander kontak by 028 313 7000.