Wits bly gesluit; UP heropen Maandag

Studente van die Universiteit van die Witwatersrand (Wits) het aangekondig hulle sal voortgaan om te betoog terwyl bedrywighede by die Universiteit van Pretoria (UP) Maandag sal hervat.

ʼn Vergadering is Saterdag by Wits gehou waartydens studente die geleentheid gekry het om hul kant te stel. Verslaggewers is versoek om die Senaat te verlaat tydens die beraadslagings. Die vergadering is gelei deur Nompendulo Mkhatshwa, nuutverkose leier van die studenteraad, en Shaeera Kalla, voormalige president.

Studente het tydens die vergadering hul woede uitgespreek oor die feit dat pres. Jacob Zuma hulle nie persoonlik by die Uniegebou toegespreek het nie. Hulle het aangevoer dat daar geen daadwerklike besluite deur pres. Zuma geneem is rakende hul besware oor die uitkontraktering van personeel en dienste, gratis hoër onderwys, die hernoeming van geboue van die universiteit en groter studenteverteenwoordiging in die raad nie. Die studente sou glo Sondag weer bymekaarkom om oor die pad vorentoe te besluit.

Adam Habib, visekanselier van die universiteit, het gesê hy is teleurgesteld deur die studente se besluit om voort te gaan met hul betogings. Die universiteit sal intussen Maandag gesluit bly.

Akademiese aktiwiteite by die Universiteit van Pretoria sal Maandag weer na normaal terugkeer. “Die biblioteke en studiesentrums sal ook oop wees. Toetse sal Woensdag voortgaan en ʼn hersiene eksamenskedule sal vroeg volgende week beskikbaar gestel word,” het Cheryl de la Rey, visekanselier van die universiteit, gesê.