![buitebioskoop ad]()
Maroela Media se Buitebioskoop,
12 September 2015
Botaniese Tuin, Pretoria
Onthou jy nog die dae toe groot filmskerms uitgetroon het en deel was van die landskap? Toe jy op ʼn naweeksaand ʼn mandjie vol padkos gepak en die bagasiebak vol kampstoele en komberse gelaai het: die hele gesin vol opwinding om inry toe te gaan!
Maroela is verheug om aan te kondig dat jy ʼn stukkie van daardie nostalgie kan herleef!
Ter viering van Afrikaans se 90ste bestaansjaar as amptelike taal, hou ons spesiaal op 12 September ʼn buitelugfliekpiekniek, ‘n “buitebioskoop”, by die Botaniese Tuin in Pretoria.
Kom kyk in die buitelug na ou en nuwe Afrikaanse films op ʼn reusagtige skerm (14 m wyd en 3 verdiepings hoog). Dit gaan jou laat voel of jy in die teater sit, maar met dieselfde nostalgie en atmosfeer van ʼn inryteater.
Bring jou kampstoele, piekniekkomberse, en -mandjie en kom kuier lekker saam! Eg Afrikaanse eet- en drinkgoed sal by stalletjies op die terrein te koop aangebied word en jy sal kan weglê aan die heerlikste pannekoeke, kerrie-en-rys en jafels tot springmielies, yskoeldrankies en nog vele meer.
Lorraine van Kokkedoor se piekniekbondels
Of jy kan jouself bederf en vooraf vir jou ʼn piekniekbondel bespreek. Dit is nie sommer net enige pienkniekbondel nie: Lorraine van Kokkedoor stel dit saam met heerlike eetgoedjies uit haar eie kombuis!
Ons hou ook vooraf ʼn musiekvertoning en ʼn fliekresensiewerkswinkel, aangebied deur Leon van Nierop. Hennie Jacobs en Diaan Lawrenson gaan tussendeur die gehoor vermaak terwyl Kaleidoskoop, MD Greyling en Rickus Nel gaan sorg vir die musiek.
Sodra die son begin sak, skop ons af met ʼn ou film, Jamie Uys se Beautiful People. Daarna vertoon ons Hollywood in my huis en sluit af met ʼn vertoning van die fliek, Die Pro. Dié fliek word amptelik eers op 18 September bekend gestel.
Bring jou vriende en familie en
kom geniet hierdie spesiale geleentheid saam met ons!
Die program:
15:00 Hekke maak oop
16:00 Vermaak met Kaleidoskoop, Rikus Nel en MD Greyling
16:00-17:00 Leon van Nierop bied ʼn fliekresensiewerkswinkel aan by die Milk Plum-koffiewinkel
18:00 – (ongeveer) 23:59 Hollywood in my huis, Die Pro en Beautiful People
Kaartjies kos slegs R95.00 per persoon. Kinders onder 7 gratis. Leon van Nierop se fliekresensiewerkswinkel kos R70.00 per persoon.
Jou kaartjie sluit toegang tot die Botaniese Tuin, vermaak en die drie rolprente in.
Lorraine van Kokkedoor se Piekniekbondel kos R130.00 per persoon. Só bondel bestaan uit:
Ciabattabroodjie, plaasbotter en basilie-makadamia-pesto; Chermoula-beessosatie met mentjogurt-doopsous; hoendersosatie, tuisgemaakte worsrolletjie gemaak van 100% bees; mini-frittata (botterskorsie, sprietuie en fetakaas). Hiermee saam is daar ook ʼn koeskoesslaai met perskes, tamatie, perskoolslaai, murgpampoentjies, brokkoli, groenbone, neute, pynappel, wortels en heuningslaaisous. Die soetigheid is ʼn koeksister op ʼn stokkie en ʼn sjokolade bruintjie.
