Rhodespark in Kensington, Johannesburg (Foto: ttruluck, panoramio.com)
Lt.kol. Lungelo Dlamini, woordvoerder van die polisie, het vroeër gesê twee paartjies het Saterdagaand in die park gestap toe hulle deur ʼn groep van 12 verdagtes voorgekeer is. Die verdagtes het die mans glo met hul eie klere vasgebind en in die dam gegooi terwyl hulle een van die vroue verkrag het. Polisieduikers het die twee mans, onderskeidelik 25 en 32 jaar oud, se liggame uit die dam gehaal. Die ander vrou kon daarin slaag om te vlug.
Tony de Munnik, voorsitter van die I Love Kensington-verening, het gesê die organisasie sal ʼn vergadering met die burgemeester van Johannesburg versoek om voorstelle te maak oor hoe openbare plekke veiliger gemaak en beter benut kan word. Daar is intussen reeds ʼn versoek aan inwoners van Kensington gerig om elke Woensdag van 16:30 tot 17:30 in Rhodespark bymekaar te kom met die doel om gemeenskapsaksie aan te moedig.
Dlamini het intussen mediaberigte dat ʼn verdagte in hegtenis geneem is in verband met die voorval ontken. Hy het gesê niemand is nog in hegtenis geneem nie.