Argieffoto

Die restaurantgroep Spur het die afgelope week te midde van die herrie waarin hulle tans gewikkel is, aangekondig die spesiale burger-aanbieding op Maandae gaan binnekort gestaak word.

Spur se uitvoerende hoof, Pierre van Tonder, het gesê dié besluit is geneem om die franchise bekostigbaar te hou. Maandae se spesiale burger-aanbieding sal na verwagting op 31 Maart tot ʼn einde kom.

“Dit was ʼn baie moeilike besluit, maar op die ou end moet ons die bekostigbaarheid en kliënte se lojaliteit aan Spur in gedagte hou,” het van Tonder aan EWN gesê.

“Ons strategie is baie duidelik: Ons het een of twee spesiale aanbiedings weggeneem om ons restaurante bekostigbaar te hou.”

Sacha du Plessis, Spur se bemarkingshoof, het dié nuus Vrydag aan Maroela Media bevestig.

Du Plessis wou nie nou kommentaar oor die besluit lewer nie, maar het wel gesê dat restaurantgroep beplan om binnekort nuwe spesiale aanbiedinge aan die publiek bekend te stel.

Hy het verder gesê Spur sal waarskynlik in volgende week die jongste nuus bekend maak.

Rian van Heerden (Foto: Facebook via Rian van Heerden)

Die gewilde JacarandaFM-radiopersoonlikheid, Rian van Heerden, het Vrydagmiddag gerugte ontken dat hy oorlede is.

Volgens ʼn verklaring wat deur die radiostasie uitgereik is, doen gerugte die ronde dat die omstrede radio-omroeper doodgeskiet is.

JacarandaFM word glo sedert Vrydagoggend oorval met oproepe van luisteraars wat gehoor het Van Heerden is vroegoggend oorlede.

“Ek bevestig net dat ek nie geskiet is nie en dat ek wel oukei is, so kom ons almal gaan aan met ons werk,” het die omroeper in ʼn podsending van hom laat hoor.

Dié nuus volg kort op vals gerugte dat die man wat betrokke was in die Spur-voorval, ook geskiet en oorlede is.

‘n Skermskoot uit die video

Dit was moontlik een van die waaghalsigste advertensieveldtogte nóg: ʼn Man van die Kanadese deelstaat Alberta het $10,000 se heliumballonne aan ʼn stoel vasgemaak, ʼn advertensiebord aan die stoel gehang en toe hoog in die lug opgestyg – sowat 4km hoog.

Teorieties was dit ʼn uitstekende plan – duisende mense sou die naam van sy skoonmaak-maatskappy hoog in die lug sien sweef en moontlik ook in hul honderde na die maatskappy stroom, maar toe die weer sowat 4km in die lug minder goed was, moes hy ʼn noodlanding doen in ʼn land.

Daniel Bora is verlede week met $25,000 beboet vir dié toertjie, wat reeds einde 2015 gebeur het. Regter Bruce Fraser het dit as die “domste toertjie ooit” bestempel.

Fraser het gesê Bora se tuinstoel het tot in die bane van vliegtuie opgestyg nadat hy vir langer as ʼn uur in die lug was. $5,000 van die boetegeld gaan na die staat se koffers, terwyl $20,000 aan ʼn liefdadigheidsorganisasie van sy keuse geskenk moet word.

Die polisie het hom deurentyd gemonitor en kort ná sy noodlanding in hegtenis geneem. Volgens sy verklaring in die hof het hy selfs ʼn vliegtuig van die lugredery WestJetFlight onder hom sien opstyg.

Bora het Vrydag onvoorwaardelik om verskoning gevra die toertjie en die gevaar wat dit vir talle ander mense ingehou het.

Hy het egter volgehou hy is nie spyt daaroor nie.

[This post contains video, click to play]

Bron: Fox6

Van die beamptes wat in hegtenis geneem is. Foto: SAPD

Agt beamptes van die Suid-Afrikaanse agentskap vir maatskaplike sekerheid (Sassa), wat in hegtenis geneem op aanklagte van bedrog en korrupsie, het Vrydag aansoek om borgtog gedoen.

Kapt. Dineo Sekgotodi, woordvoerder van die Valke in Mpumalanga, het gesê die verdagtes, Lungile Magdeline Msimago  (47), Nelle Silindile Lengwati (32), Phumzile Eunice Makaringe (47), Daisy Sitani  Thwala (50), Graham Butini Ndlovu (52), Nomthandazo  Rebeccah  Nkosi (53), Racheal Skholiwe Khoza (42) en Jane Zandile Nkosi (40) het saam in die Tonga-landdroshof verskyn nadat hulle Donderdag in hegtenis geneem is.

“Al die verdagtes het om borgtog aansoek gedoen en borgtog van R2 000 elk is toegestaan op voorwaarde dat hulle hul paspoorte inhandig,” het Sekgotodi gesê.

Die saak is tot 26 Mei uitgestel vir verdere ondersoek.

Maroela Media het vroeër berig die beamptes het glo Sassa se stelsels gemanipuleer deur mense sonder gebreke as gestremdes te klassifiseer om sodoende toelaes te bekom. “Die verdagtes het die staat glo so uit meer as R5,5 miljoen bedrieg,” het Sekgotodi vroeër gesê.

Die ondersoek na die bewerings het reeds in Desember 2015 begin.

Pres. Jacob Zuma. ArgieffFoto: GCIS

Die provinsiale regering in Noordwes het bevestig die Zuma-standbeeld word nie meer in Groot Marico opgerig nie.

“Ons is oortuig daarvan dat die PAIA-aansoek, wat AfriForum ingedien het om sekere inligting aan te vra oor die oprigting van dié standbeeld, direk daartoe gelei het dat die projek gestaak is,” het Hendrik Oosthuizen, AfriForum se distrikskoördineerder vir Noordwes, Vrydag gesê.

Volgens Oosthuizen het Noordwes se provinsiale regering egter beweer die kritiek en negatiewe reaksie van die gemeenskap is nie die rede waarom die oprigting van die standbeeld gestaak word nie.

AfriForum verwelkom hierdie besluit en dink steeds die R6 miljoen vir die Zuma-standbeeld kan op veel beter maniere aangewend word.

“Indien besluit word om hierdie standbeeld in die toekoms op te rig, sal ons dit wéér stop,” het Oosthuizen afgesluit.

Lede van die gemeenskap wat enige nuwe inligting oor die projek het, moet asseblief ʼn e-pos na hendrik@afriforum.co.za stuur.

Argieffoto

Die ontbinde en geskende liggaam van ʼn albino-man is vandeesweek in die Hennopsrivier, suidwes van Pretoria, gevind.

Konst. Tumisang Moloto, polisiewoordvoerder, het Vrydag aan Maroela Media gesê lede van die publiek het die man se liggaam Woensdag omstreeks 20:00 in die rivier naby die R511-pad in Centurion gesien en die polisie ontbied.

“Die man se liggaam het al ontbind. Sy voete was met ʼn tou vasgemaak en een van sy hande is weg,” het Moloto gesê.

Moloto het gesê die man is vermoedelik elders vermoor voordat sy liggaam in die rivier gestort is.

ʼn Nadoodse ondersoek word gedoen om die oorsaak en tyd van die man se dood te bepaal.

Die Erasmia-polisie ondersoek ʼn saak van moord. Niemand is nog in verband met die voorval in hegtenis geneem nie.

Argieffoto: Justin Sullivan/Sullivan Photography

Vier kinders, drie meisies en ʼn seun, het Donderdagaand in ʼn huisbrand in Noordwes gesterf.

Lt.kol. Pelonomi Makau, provinsiale polisiewoordvoerder, het gesê die kinders, tussen vyf en sewe jaar oud, het in ʼn plakkershut in die Phofung-gedeelte van Madibogopan, noordoos van Stella, doodgebrand.

“Die brand het omstreeks 20:30 uitgebreek. Die kinders was alleen in die plakkershut terwyl die ma van twee van die kinders na bewering by haar bure was,” het Makau gesê.

Die kinders is op die toneel dood verklaar. ʼn Vyfde kind, ʼn 11-jarige seun, het die brand oorleef en is in ʼn ernstige toestand na ʼn nabygeleë hospitaal geneem.

Die Madibogo-polisie ondersoek ʼn saak van brandstigting.

Carl Schoombie

Brent Henry en Juane Jacobs is Vrydag in die Wes-Kaapse hooggeregshof skuldig bevind aan moord op Carl Schoombie (27).

Lee Schoombie, Carl se broer, het gesê geregtigheid het geskied. “Die afgelope 15 maande het my oë vir soveel goed in die lewe oopgemaak. Dit het my nederig gemaak en ʼn ander uitkyk op die lewe gegee.” Lee het die publiek bedank vir hul ondersteuning aan hom en sy gesin. “Die volgende hoofstuk is die vonnisoplegging en ons is reg daarvoor.”

Schoombie het op 21 November 2015 saam met vriende by ʼn nagklub in Claremont in Kaapstad gekuier toe ʼn geveg uitgebreek het. Hy was nie daarby betrokke nie en het die klub in ʼn taxi verlaat.

Die taxi is in die rigting van Rondebosch deur ʼn ander voertuig, met twee mans daarin, van die pad af gedruk. Die twee het Schoombie en sy vriende daarvan beskuldig dat hulle die geveg begin het. Schoombie en sy vriende het herhaaldelik gesê hulle was nie betrokke nie, maar is nogtans erg aangerand.

Schoombie is met ernstige kopbeserings in ʼn hospitaal opgeneem waar hy ʼn paar dae later dood is.

Henry is kort ná die moord in hegtenis geneem, terwyl Jacobs in Februarie 2016 in Johannesburg in hegtenis geneem is. Henry is vroeër op borgtog van R1 000 vrygelaat. Jacobs het sy borgtogaansoek laat vaar.

Henry se borgtog is Vrydag teruggetrek en hy is in hegtenis geneem. Die saak is tot 18 April uitgestel vir vonnisverrigtinge.

Lees alle vorige berigte oor Carl Schoombie op Maroela Media.

Jacques le Roux. Foto: Verskaf

Helpmekaar Kollege in Johannesburg is die week geruk deur die dood van ʼn gr. 10-leerder.

Jacques le Roux (16) het na bewering Woensdagoggend in sy ouerhuis in Johannesburg selfmoord gepleeg.

Klaus König, skoolhoof van Helpmekaar Kollege, het gesê almal by die skool was geskok oor die nuus. “Dit is ʼn ongelooflike hartseer saak. Ons fokus by die skool is om nou Jacques se nagedagtenis te eer en terselfdertyd soveel as moontlik ondersteuning aan sy familie, vriende en al die leerders by die skool te bied,” het hy gesê.

Volgens König staan die skool se opvoedkundige en kliniese sielkundiges die leerders by sedert hulle van Le Roux se dood gehoor het. Ontlontingsessies met Jacques se jaargroep en die hele skool is gehou.

“Ek onthou Jacques as ʼn liewe seun, wat goed by die skool aangepas het en gewild was onder sy vriende. As ek aan hom dink, onthou ek die seun met die bokkie-oë, wat net wou goed doen en graag deelgeneem het aan aktiwiteite by die skool. Hy was ʼn wonderlike kind.”

Mardene, Jacques se ma, het haar seun intussen beskryf as “almal se lieflingkind”. ʼn Gedenkdiens vir Jacques word Dinsdag om 11:00 in die Melville NG-kerk gehou.

Jacques word oorleef deur sy ouers, Stefan en Mardene en sy ouer broer, Estian, wat tans aan die Universiteit Stellenbosch studeer.

Maroela Media het vroeër berig Jerry Goddard (15), ʼn gr. 9-leerder aan die Hoërskool Sand du Plessis in Bloemfontein, het op 14 Maart selfmoord gepleeg. Jerry se stiefpa en ʼn buurseun het op sy liggaam in die motorhuis van die gesin se huis in Wilgehof afgekom waar hy homself na bewering opgehang het. Lees meer hier.

Argieffoto (Foto: imgkid.com)

Die Gautengse polisie ondersoek ʼn saak van moord nadat ʼn sakeman Vrydag in ʼn voertuig doodgeskiet is.

Kapt. Kay Makhubele, provinsiale polisiewoordvoerder, het gesê die voorval het omstreeks 07:00 in Rockville in Soweto plaasgevind.

“Die eienaar van ʼn taxi-onderneming en sy vennoot het in ʼn patrollievoertuig naby die Makheta-supermark gesit, toe ʼn onbekende aantal verdagtes hulle genader en op hulle losgebrand het,” het Makhubele gesê.

Die man is op die toneel dood en sy vennoot is in ʼn kritieke maar stabiele toestand na ʼn nabygeleë hospitaal geneem.

Die motief vir die aanval is onbekend en word ondersoek. Niemand is nog in verband met die voorval in hegtenis geneem nie.

Die naam van die slagoffer is nog nie bekend gemaak nie.

Argieffoto

Wouter Wessels, VF Plus-LPW in die Vrystaatse wetgewer, het Vrydag in die debat oor die departement van ekonomiese ontwikkeling, kleinsake-ondernemings, toerisme en omgewingsake gesê die ANC se arrogansie oorskry sy intelligensie.

Hy het die ANC gewaarsku dat die geskiedenis leer dat meerderheidsregerings altyd verneder word wanneer hulle arrogant raak.

“Ekonomiese geleenthede verander as gevolg van etlike faktore. Die Vrystaat se ekonomiese landskap is drasties besig om te verander met myne wat die einde van hul produksieleeftyd bereik en landboumetodes wat genoodsaak is om te verander,” het Wessels gesê.

Wessels het gesê dat die departement se hooffokus die uitbou en ontwikkeling van die Vrystaatse ekonomie moet wees, maar dat hulle nooit in die doel sal slaag met die huidige strategie van herverdeling nie.

“Voldoende ondersteuning word nie aan klein-, medium- en mikro-ondernemings gegee nie. Die meerderheid van hierdie ondernemings misluk en miljoene rand gaan verlore. Die departement is veronderstel om behoorlike navorsing te doen en beleggers en kleinsake-eienaars by te staan om sodoende die ekonomie te stimuleer deur entrepreneurs te ondersteun en werkskepping te bevorder. Generiese sakeplanne en gebrekkige leiding en ondersteuning is net eenvoudig nie voldoende nie.”

Hy het sy teleurstelling uitgespreek in die LUR, dr. Bennie Malakoane, en gesê die LUR se mooipraatjies en lippetaal sal nie kos op die tafel van duisende arm Vrystaters sit nie. “Die probleem is nie meer apartheid nie, maar die regering se regressiewe ideologie.”

Wessels het gewaarsku dat die ekonomie nie sal groei as korrupte amptenare en tenderpreneurs toegelaat word om die staatskas jaar na jaar te besteel nie.

“Strenger optrede teen hierdie misdadigers is dringend nodig. Die departement moet sy prioriteite herevalueer en die belangrikste daarvan is die uitbou van die ekonomie – voordat daar nie meer ʼn ekonomie is om uit te bou nie.”

Die brand by die Durbanse hawe. Foto: Rescue Care

Brandbestryders het gisteraand en regdeur die nag gespook om ʼn reusebrand in ʼn pakhuis by die Durbanse hawe onder bedwang te bring en mense in ondernemings moes die gebied verlaat.

“Die polisie het almal in die omgewing aangemoedig om vir hul eie veiligheid die gebied te verlaat. Alle sakeondernemings is gevra om bedrywighede te staak en ʼn gedeelte van die M4-snelweg, Southcoastweg en M7 was vir verkeer gesluit om verkeersprobleme te vermy,” het Garrith Jamieson, woordvoerder van Rescue Care, gesê.

Die brand was teen Saterdagoggend grootliks onder beheer maar nie heeltemal geblus nie. ʼn Digte rookwolk het oor die pakhuis langs Southcoastweg in Rossburgh, wat ondermeer kunsmis en ander vlambare stowwe gestoor het, gehang. Brandbestryders is steeds op die toneel om te verseker dat die smeulende brand nie weer opvlam nie.

Jamieson het gesê volgens brandbestryders was dié brand een van grootstes wat hulle nog moes beveg. Die pakhuis van nagenoeg 200 000 m² is byna heeltemal verwoes. “Teen 06:30 was die brand nog nie heeltemal geblus nie, maar dit was minder erg as wat die omstreeks middernag was.”

Maroela Media het vroeër berig die brand het Vrydagoggend uitgebreek. Twee mense, ʼn werker in die pakhuis en ʼn brandbestryder, het geringe beserings opgedoen en is na ʼn nabygeleë hospitaal geneem vir behandeling.

ʼn Stormsterk wind het die brand aangewakker.

Dit is nog onduidelik hoe die brand ontstaan het. ʼn Behoorlike ondersoek sal gedoen word sodra die toneel veilig verklaar is.

Twee vragmotors en ‘n bus het Saterdag gebots. Foto: Netcare 911

Minstens 17 mense is beseer en verkeer erg ontwrig nadat twee vragmotors en ʼn bus Saterdagoggend op die N3-snelweg naby Mooirivier in KwaZulu-Natal gebots het.

Chris Botha, woordvoerder van Netcare 911, het gesê die botsing het omstreeks 06:40 in die suidelike baan van die snelweg plaasgevind.

“Dit is in dié stadium nie duidelik hoe die ongeluk gebeur het nie. Owerhede is na die toneel ontbied om die oorsaak van die ongeluk te ondersoek,” het Botha gesê.

Die bestuurder van een van die vragmotors was in ʼn kritieke toestand in die wrak van die swaarvoertuig vasgekeer. Ses mense het ernstige beserings opgedoen en tien mense is gering beseer.

“Die beseerdes is op die toneel gestabiliseer en na hospitale in Pietermaritzburg geneem vir verdere behandeling.”

Die wrakstukke het die suidelike baan versper en die N3-konsessie moes ʼn gedeelte van die snelweg sluit en verkeer na Durban herlei.

Teen 10:30 is ʼn gedeelte van die snelweg vir verkeer oopgestel om die opgehoopte verkeer te verlig.

Polisie op die toneel. Foto: Verskaf

Die Vrystaatse polisie het ʼn man in hegtenis geneem wat glo dagga geplant het en dit tussen mielies probeer versteek het.

Sers. Mmako Mophiring, polisiewoordvoerder, het Saterdag gesê die Phuthaditjhaba-polisie se honde-eenheid was Donderdag om 10:00 besig met roetinepatrollie in die Naledi-nedersetting in die QwaQwa-omgewing toe hulle ʼn verdagte mielielandery opgemerk het.

“Die beamptes het gesien mielies is naby ʼn huis geplant, maar ʼn vreemde bos het die mielies oorgroei,” het Mophiring gesê. Die beamptes het gaan ondersoek instel en gesien dagga is tussen die mielies geplant.

ʼn Verdagte is opgespoor en in hegtenis geneem. Die polisie het die dagga verwyder en daarop beslag gelê.

“Die dagga het in totaal 25,7kg geweeg en het ʼn geskatte straatwaarde van R25 000.”

Die verdagte moet Maandag in die Phuthaditjhaba-landdroshof verskyn.

Polisie op die toneel. Foto: Verskaf

‘n Groep mense vier Aarduur in Kanada. Foto: Worldwildlife.org

Eskom het ʼn beroep op Suid-Afrikaners gedoen om die krag vir ʼn uur lank af te skakel as deel van Aarduur wat vandag wêreldwyd gevier word. Aarduur in Suid-Afrika is vandag (25 Maart) van 20:30 tot 21:30.

Aarduur word as die wêreld se grootste viering van die planeet beskryf. Honderde miljoene mense wêreldwyd gaan tydens Aarduur hul ligte vir 60 minute afskakel om te wys hulle wil bydra om die aarde te beskerm teen klimaatsverandering. Die World Wide Fund (WWF) organiseer dié inisiatief wat vanjaar sy tiende bestaansjaar vier.

Aarduur het in 2007 in Sydney, Australië, begin toe 2,2 miljoen huishoudings hulle ligte ʼn uur lank afgeskakel het om standpunt teen klimaatsverandering in te neem. Vandag vind Aarduur in 162 lande wêreldwyd plaas om mense aan te moedig om hulleself te verbind tot ʼn volhoubare wêreld wat bevolkings in staat sal stel om genoeg skoon water, plante en diere te hê om die aarde mee te deel.

Eskom het ʼn beroep op verbruikers gedoen om die inisiatief te ondersteun.

Eskom sal die besparing tydens dié uur meet en Suid-Afrikaners later inlig hoeveel energie in dié tydperk gespaar is en met watter persentassie CO2-uitlaatgasse verminder is.

[This post contains video, click to play]

Roger en Christine Solik.

Die KwaZulu-Natalse polisie het ʼn deurbraak gemaak in sy ondersoek na die dubbelmoord op Roger (63) en Christine (56) Solik. Die egpaar is in Februarie op ʼn plaas in KwaZulu-Natal aangeval, ontvoer en vermoor.

Kapt. Nqobile Gwala, provinsiale polisiewoordvoerder, het Saterdag gesê die deurbraak is Vrydagaand gemaak met die inhegtenisnemings van die hoofverdagte en nog twee verdagtes, onderskeidelik in Umlazi en die Impendle-omgewing.

“Beamptes van die Nottingham-polisie in samewerking met die taakspan van die honde-eenheid het inligting opgevolg wat hulle na Umlazi gelei het waar die hoofverdagte in hegtenis geneem is,” het Gwala gesê. “Verdere ondersoek het hulle na Impendle gelei waar nog twee verdagtes in hegtenis geneem is. Daar is twee ongelisensieerde vuurwapens en vermeende gesteelde eiendom in hul besit gevind.”

Volgens Gwala is een van die vuurwapens waarop die polisie beslag gelê het, vroeër as gesteel in Orlando aangemeld. Die vuurwapens sal vir ballistiese toeste gestuur word om vas te stel of dit in ander misdrywe gebruik is.

Die drie verdagtes, tussen 31 en 42 jaar oud, moet Maandag in die Howick-landdroshof verskyn. Altesaam vier verdagtes word nou van die moord, roof en ontvoering op die Solik-egpaar aangekla.

Maroela Media het vroeër berig die polisie is op 17 Februarie na die Solik-egpaar se huis in die Bend Country Estate op ʼn plaas in die Nottingham Road-omgewing ontbied. Daar is by die huis ingebreek en daar was bloedvlekke. Die Solik-egpaar was nêrens te vinde nie.

Christine se liggaam is later die dag ongeveer 70 km van die huis in die Impendle-rivier gevind met haar hande vasgebind. Roger, wat aan Parkinson se siekte gely het, se liggaam is op 20 Februarie gevind, sowat 2 km van die plek waar Christine se liggaam gevind is.

Die eerste verdagte, Thulani Moses Mthembu (43), is in Maart in verband met die voorval in hegtenis geneem. Hy het op 13 Maart in die hof verskyn, waarna die saak uitgestel is vir sy borgtogaansoek.

Die handelaar waar die voertuig gesteel is. Foto: Via @Medi_Response / Twitter

Twee werknemers van ʼn Maserati-handelaar in Johannesburg is Saterdagoggend ontvoer toe een van dié luukse voertuie by die handelaar gekaap is.

Kapt. Kay Makhubele, provinsiale polisiewoordvoerder, het aan Maroela Media gesê die voorval het omstreeks 11:00 by die handelaar in William Nicolweg, Bryanston, in die noorde van die stad, plaasgevind.

“Die werknemers was op die perseel en was op pad om brandstof in twee voertuie te gooi, toe vyf gewapende mans hulle genader het. Die mans het die werknemers gedwing om agter in ʼn wit Maserati Levante sportnutsvoertuig te klim en het met hulle weggejaag terwyl die ander voertuig op die perseel agtergelaat is,” het Makhubele gesê.

Die werknemers is sowat ʼn uur later in veld in Bassonia in die suide van die stad vrygelaat. “Die werkers is ongedeerd en kon daarna hul werkgewer bel en hulp ontbied.”

Die mans het hul verklaring aan die polisie afgelê toe hulle veilig terug by hul werkplek was.

Die polisie ondersoek ʼn saak van sakeroof. Niemand is nog in verband met die voorval in hegtenis geneem nie. Volgens Makhubele is die voertuig ook nog nie opgespoor nie.

Patat die vriendelike donkie. Foto: Verskaf

Die video volg onderaan die berig

Patat, oftewel Donka, is ʼn 18 maande oue donkievulletjie van Suid-Afrika wat oornag ʼn internetsensasie geword het.

Talle sosialemediagebruikers het vandeesweek op Facebook en WhatsApp met Patat kennis gemaak waar hy dolgelukkig en balkend nader gehardloop kom as hy sy menspappa, Stoffel van Zyl (52), se stem hoor.

“Sy blydskap om sy mense te sien is iets ongelooflik om te aanskou,” is een van die talle kommentare wat die emosies wat dié video uitlok, opsom.

Stoffel, ʼn boer en bekende in die landboukringe, het Saterdag aan Maroela Media gesê hy wou al lankal ʼn donkie gehad het om hans groot te maak.

“Ek het ʼn plaas buite Groblershoop in die Nood-Kaap, maar woon op ʼn plaas buite Welkom in die Vrystaat. Ek en my vennoot het laat in 2015 van Groblershoop teruggery Vrystaat toe, toe hy vir my sê hy weet van ʼn weesdonkie waarvoor iemand ʼn eienaar soek. Ek het daar gaan stop en hom aangeneem. Ons het hom aanvanklik Patat genoem, maar hy het vinnig die bynaam Donka gekry,” het Stoffel gesê.

Patat was twee maande oud toe Stoffel met hom by sy Welkom-huis opgedaag het. Hy is in die Van Zyl-gesin se huis grootgemaak en het hom vinnig as deel van die gesin ingewurm.

Ná ʼn jaar het hy egter te groot geword vir die huis en moes hy van Desember op die Groblershoop-plaas gaan bly, waar hy vinnig maats gemaak het met ʼn “potbelly”-varkie, twee ganse, hoenders en twee koedoekalfies. Hy het egter nie van sy mensfamilie vergeet nie.

“Ons kom so een keer per maand op die Groblersoop-plaas en as hy my bakkie sien of my stem hoor, kom hy opgewonde aangehardloop. Die video wat tans die ronde op sosiale media doen is sowat ʼn maand gelede geneem, maar is een van baie wat wys hoe gelukkig hy is. Ek het dit op Facebook geplaas om vir my vriende te wys en toe ek weer sien is dit teen Saterdag al meer as 220 000 keer gekyk.”

Stoffel beskryf Patat as ʼn liefdevolle dier met ʼn siel en persoonlikheid. “ʼn Donkie is nie ʼn dier wat alleen wil wees nie, hy wil aan iets of iemand geheg wees. Donka is ʼn deel van ons gesin en steel harte waar hy gaan. Hy spring gereeld agter op my bakkie en het al saam met ons dorp toe gery om ʼn melkskommel by McDonald’s te gaan drink. Almal kyk vir die donkie en wil foto’s neem, hy is baie geliefd.”

Patat word nie net met melkskommels bederf nie: Hy lê ook graag weg aan wortels, appels en enige peuselhappies wat Stoffel aan hom dra … iets waarvan hy baie gaan kry as hy in September twee jaar oud word.

Argieffoto: Reint Dykema

Wouter Wessels, VF Plus-LPW in die Vrystaatse wetgewer, het in ʼn debat oor die begroting van die departement van landbou en landelike ontwikkeling gesê dat die regering se oorbeklemtoning van grond tot Suid-Afrika se ondergang sal lei.

Hy het gewaarsku dat Suid-Afrika op dieselfde krisis as wat Zimbabwe tans beleef, afstuur.

Wessels het gesê die regering moet ophou om populistiese geluide te maak en besef dat Suid-Afrikaners sonder voedsel gaan sit as hulle nie daadwerklike maatreëls instel en hande vat met kommersiële landbou om voedselsekerheid vir die land te verseker nie.

“Die Suid-Afrikaanse Buro vir Voedsel- en Landboubeleid het onlangs bevestig dat die droogte ʼn ooglopende impak op landbou en gevolglik verbruikersprodukte en voedsel gehad het. So het die koste van mieliemeel byvoorbeeld met 22% toegeneem oor die verloop van die laaste jaar. Waar gaan dit eindig as die regering van die dag midde reuse- eksterne drukfaktore op die landbousektor nog kommersiële boere van hul grond verjaag, terwyl 90% van hul vorige grondhervormingsprojekte reeds misluk het?” het Wessels gevra.

Hy het gesê die departement moet fokus op belangriker kwessies soos die aanpassing by klimaatsverandering en die impak daarvan. “Die Suid-Afrikaanse landskap is besig om te verander, verstedeliking neem toe en die platteland is besig om te ontvolk. Die vraag na voedsel raak groter, soos die populasie groei, maar dit raak daagliks moeiliker om genoeg voedsel te produseer weens verskeie faktore.”

Volgens Wessels moet die departement en regering voedselvoorsiening prioritiseer deur aandag te gee aan slim-landbou (SmartAgri) wat klimaatsverandering in ag neem. “Die regering moet ophou om ideologiese uitlatings vir goedkoop politieke gewin te maak. ʼn Honger volk ken nie lojaliteit nie en dit sal tot die ANC, maar ook Suid-Afrika se ondergang lei,” het hy afgesluit.

Die mangat waarin die seun geval het. Foto: Verskaf

ʼn Seun is Saterdag in die Vrystaatse dorpie Clocolan in ʼn fratsongeluk dood terwyl hy gespeel het.

Russel Meiring, woordvoerder van ER24, het gesê die seun, tussen 12 en 14 jaar oud, het in die Mokodumela-nedersetting op ʼn stuk beton om ʼn mangat gespeel. Dit lyk asof die mangat oop was.

“Volgens omstanders het die seun sy balans verloor, in die gat geval en verdrink. Omstanders het dadelik hulp ontbied,” het Meiring gesê.

Reddingswerkers het by die toneel opgedaag en spesiale toerusting gebruik om die seun uit die gat te kry.

“Paramedici het hom ondersoek toe hy uitgehaal is, maar hy het ongelukkig geen tekens van lewe getoon nie en is op die toneel dood verklaar.”

Die polisie ondersoek die voorval.