Argieffoto

ʼn Man is Woensdag in die vroeë oggendure op ʼn plaas in die Underberg-gebied in KwaZulu-Natal doodgeskiet.

Kapt. Nqobile Gwala, woordvoerder van die polisie, het gesê ʼn egpaar het omstreeks 01:00 wakker geword toe drie gewapende rowers hul huis op die plaas binnegekom het. “Die aanvallers het geld geëis en twee skote op die 47-jarige man afgevuur. Hy het koeëlwonde in die linkerkant van sy bors opgedoen en het op die toneel gesterf,” het Gwala gesê.

Sy het gesê die mans het met klanktoerusting, ʼn selfoon, klere, kruideniersware en ander huishoudelike items op die vlug geslaan.

“Die polisie is steeds besig om leidrade op te volg om die verdagtes op te spoor. Ons doen ʼn beroep op enigiemand met inligting om dadelik met hul plaaslike polisie in verbinding te tree of Crime Stop op 08600 10111 te skakel,” het Gwala gesê.

ʼn Saak van moord is by die Himeville-polisie aanhangig gemaak.

Maroela Media weerhou die naam van die oorledene totdat al sy naasbestaandes in kennis gestel is.

EFF-betogers buite die hof. Foto: Twitter

Brig. Motlafelo Mojapelo, woordvoerder van die polisie, het gesê dit was die tweede dag van Scott-Crossley se borgaansoek en dat dit sonder voorval verloop het. Scott-Crossley is Maandag in ʼn Njala-voertuig, wat deur swaar gewapende polisielede begelei is, na die hof geneem.

Talle betogers het Maandag en Dinsdag buite die hof saamgedrom en geëis dat Scott-Crossley borgtog geweier word. Die saak is tot 10 Februarie uitgestel wanneer Scott-Crossley sal hoor of sy aansoek suksesvol was. Hy bly in aanhouding.

Scott-Crossley is op 18 Januarie in Pretoria in hegtenis geneem. Maroela Media het vroeër berig ʼn lasbrief is op 21 Desember vir sy inhegtenisneming uitgereik in verband met ʼn voorval op 14 Desember.

Op dié betrokke dag het Silence Mabunda (37) glo iets by ʼn winkel in Hoedspruit gekoop. Mojapelo het vroeër gesê Mabunda het buite die winkel op sy foon staan en praat toe ʼn man die foon uit sy hand gegryp en dit op die grond stukkend gegooi het.

Mabunda het toe glo teruggestap na sy werkplek, ʼn wildrehabilitasiesentrum buite Hoedspruit. Dit is toe dat hy glo deur ʼn voertuig omgestamp is waarna die bestuurder ook met die voertuig oor hom sou gery het. Volgens berigte het Mabunda ernstige beserings aan sy bene opgedoen en loop nou met krukke.

Die polisie het aanvanklik ʼn tref-en-trap-ongeluk ondersoek, maar dit is intussen na ʼn saak van poging tot moord verander.

Scott-Crossley is in 2005 tot lewenslange tronkstraf gevonnis vir sy aandeel in die moord op een van sy werkers, Nelson Chisale, wat in ʼn hok met drie wit leeus gegooi is. Chisale is glo ook erg aangerand deur twee ander werkers voordat hy in die hok gegooi is.

Scott-Crossley se skuldigbevinding is in 2007 deur die appèlhof ter syde gestel en sy vonnis is na vyf jaar tronkstraf verander vir medepligtigheid aan die daad aangesien daar nie bepaal kon word of die oorledene moontlik al weens die aanranding gesterf het voordat hy in die leeuhok gegooi is nie.

Scott-Crossley is in 2008 op parool vrygelaat en het teen einde 2010 sy vonnis uitgedien. Lees alle vorige berigte oor Mark Scott-Crossley op Maroela Media.

The life of Mark Scott-Crossley – the man who was involved in a horrific crime in which Nelson Chisale was thrown… https://t.co/jCn8L8tXZZ pic.twitter.com/AuIlYpgXYR

— TrendingMzansi (@TrendingMzansi) December 24, 2016

Zoey Beckmann. Foto: Facebook

Die Noord-Kaapse egpaar wie se tweejarige dogtertjie verlede week in ʼn staatshospitaal in Kimberley gesterf het, minder as ʼn dag nadat sy opgeneem is, gaan met regsaksie teen die provinsiale departement van gesondheid begin.

Jo-Ann Beckmann het Sondag in ʼn roerende inskrywing op haar Facebook-blad vertel hoe hul dogter, Zoey, die oggend van 24 Januarie in die hospitaal opgeneem is. Sy verduidelik dat Zoey gebraak het en dat haar maag erg geloop het.

Volgens Beckmann was dokters vir meer as twee en ʼn half uur lank by die hospitaal besig met papierwerk terwyl Zoey al hoe swakker geword het. Beckmann beweer eers nadat Zoey bewusteloos geraak het, het dokters vir haar ʼn binneaarse oortapping toegedien. Beckmann beweer ook dat Zoey ʼn allergiese reaksie vir die antibiotika wat vir haar gegee is getoon het.

“Die suster het vir haar antibiotika ingespuit. Onmiddellik het Zoey se hand bloedrooi geword met groot wit blase. Die suster het ophou spuit en die dokter gaan roep om te kom kyk. Die dokter spuit sowaar [die antibiotika] weer in,” het Beckmann in haar Facebook-inskrywing geskryf.

Sy beweer nagpersoneel by die hospitaal wat Zoey se behandeling by die dagpersoneel oorgeneem het, het gesê die binneaarse oortappings wat Zoey deur die dag toegedien is, het “nie gewerk nie” en moes “vervang word”.

Beckmann het vroeër aan Maroela Media gesê dat dokters aan hulle gesê het dat algehele dehidrasie en skok die oorsaak van haar dood was. Volgens Beckmann glo sy en haar man, Edward, dat die hospitaalpersoneel nalatig opgetree het en dat dit die oorsaak van hul kind se dood was.

Die egpaar het ʼn amptelike klagte by die Noord-Kaapse departement van gesondheid ingedien en is tans besig met regstappe.

Zoey Beckmann. Foto: Facebook

Lebogang Majaha, woordvoerder van die departement, het aan Maroela Media gesê dat die departement ʼn formele ondersoek na Zoey se dood van stapel gestuur het. “Die proses is reeds aan die gang en behoort binne die volgende drie tot vier weke afgehandel te wees,” het hy gesê.

“Die familie sal die uitslae van die ondersoek skriftelik ontvang. Weens die sensitiwiteit van die ondersoek sal die uitkoms van die ondersoek net aan hulle bekendgemaak word. Dit is hulle keuse of hulle dit aan die publiek beskikbaar wil stel. As hulle nie tevrede is met die bevindinge nie, kan hulle natuurlik ook besluit of hulle die saak verder wil neem.”

Majaha het gesê die departement sal na aanleiding van die bevindinge van die ondersoek besluit of daar verdere stappe teen enige van die hospitaalpersoneel gedoen sal word.

Zoey word vandag in Kimberley begrawe.

Sandra Snijders voor die aanval.

Sandra Snijders (68), die weduwee wat verlede week erg aangerand is in haar huis in uMgeni Park in die noorde van Durban, word vandag uit die hospitaal ontslaan.

Maroela Media het vroeër berig Snijders het verlede Dinsdag nie vir werk opgedaag nie, waarna haar familie in kennis gestel is. Haar seun, Bram, het by haar huis gaan ondersoek instel en sy ma aangetref waar sy bewusteloos op die vloer van haar sitkamer gelê het.

Sandra was in ʼn kritieke toestand toe sy gevind is. Sy is erg aangerand en gewurg voordat haar aanvallers die huis geplunder en gevlug het. Sandra se man is in Oktober 2016 dood en sy is nog besig om gewoond te raak om op haar eie woon.

Sandra se dogter, SJ Snijders, het gesê die aanval op haar ma was afgryslik. “My ma kan nou weer regop sit. Die kneusplekke aan haar gesig lyk steeds baie erg en sy het ook nog baie pyn. Sy is steeds by tye gedisoriënteerd, maar dit gaan beter met haar gemoed en sy vertel selfs ʼn grappie nou en dan.” SJ woon in Londen en het Donderdag in Suid-Afrika aangekom.

Sandra Snijders kort na die aanval.

Bram het intussen aan Maroela Media gesê sy ma kan nie veel van die aanval onthou nie. “Sy onthou dit was twee mans in wit oorpakke.” Volgens Bram het sy ma nie die verdagtes geken nie.

Sandra het kneusplekke aan haar gesig, arms en bene opgedoen. Sy is op haar neus geslaan, haar lip is gesny en daar was wurgmerke aan haar nek. Volgens Bram is die verdagtes nog nie geïdentifiseer nie en is niemand nog in hegtenis geneem nie.

Intussen bedryf familielede en vriende van Sandra steeds ʼn skarebefondsingsinisiatief om geld in te samel om haar mediese onkoste te dek. Besoek Sandra se GoFundme-blad vir meer inligting of om tot dié geldinsameling by te dra.

Sean Smith in sy skoolklere. Foto: Verskaf

Alhoewel Sean Smith (17) nog “af” dae beleef, het die ondersteuning wat hy uit talle oorde ontvang het sedert hy verlede jaar by die dood omgedraai het, hom gehelp om ʼn nuwe mylpaal op sy pad na herstel te bereik.

Sean is Maandag vir die eerste keer terug na sy ambagskool, Suiderberg Skool in die weste van Pretoria, sedert hy op 17 Oktober in Centurion derdegraadse brandwonde aan sy hande, ken, nek en gedeeltes van sy rug, bors en arms opgedoen het in ʼn fratsongeluk met petrol. Hy was vir lank onder verdowing en het behandeling in drie hospitale ontvang.

Hy is aanvanklik na die Unitas-hospitaal in Centurion geneem waar dié private hospitaal hom op hul onkoste behandel het aangesien sy ma, Me-Lissa, ʼn enkelouer is en nie ʼn mediese fonds kon bekostig nie. Hy is daarna na die Dr. George Mukari-staatshospitaal oorgeplaas toe daar ʼn plek oopgegaan het. Daar is egter nie ʼn brandsorgeenheid by dié hospitaal nie en miljoene rande is ingesamel om hom in Milpark-hospitaal in Johannesburg te laat opneem, waar hy sedert 30 Oktober gespesialiseerde behandeling ontvang het.

Hy is uiteindelik in Desember uit Milpark ontslaan waarna hy teruggekeer het na sy ouerhuis in Theresapark in die noorde van Pretoria waar hy ʼn intieme en rustige feesgety saam sy ma, ouer broer Dylin (19), jonger boetie Devin (11) en suster Michelle (13) deurgebring het.

“Devin het vanjaar met skool by Suiderberg begin. Elke keer as ek en Sean hom by die skool gaan op- of aflaai, drom Sean se skoolmaats om die motor saam om te hoor hoe dit gaan. Dit het naderhand ʼn lang proses geword. Ons het toe, met toestemming van sy dokters, besluit dat dit tyd is dat hy terug gaan skool toe,” het Me-Lissa Woensdag aan Maroela Media gesê.

Me-Lissa verduidelik Sean was aan die begin skrikkerig en skaam om weer sy skoolmaats te sien. “Toe hulle hom die eerste keer sien toe ons sy boetie gaan aflaai het, het hulle nadergekom en hom gegroet en drukkies gegee. Niemand het na hom of sy letsels gestaar nie. Hulle het vertel hoe hulle saam met almal vir hom gebid het en bly was met elke mylpaal wat hy bereik het. Dis toe wat ek vir hom sê hy het niks om oor skaam te wees nie, hy is ʼn hero in mense se oë.”

Sy het gesê die eerste paar dae terug by die skool het goed gegaan en hy word nie deur skoolmaats geterg nie. Hy het in Desember 17 geword en die skool het dit goed gedink om hom deur te sit na gr. 10 sodat hy kan voortgaan om in ʼn ambag te spesialiseer.

“Voordat hy terug is skool toe, was hy een aand baie negatief en het gesê dit sou beter wees as hy maar dood gegaan het. Ek het toe saam met hom deur die hordes boodskappe op Facebook en WhatsApp gegaan van al die mense wie se harte hy aangeraak het. Ons het honderde boodskappe van ondersteuning van regoor die wêreld ontvang en van mense wie ons nie eens ken nie. Dit het hom weer krag gegee om aan te gaan.”

Sy sê ook as Sean af voel, is Annerie du Plooy, direkteur van die Hero Burn Foundation, net ʼn oproep ver om hom moed in te praat. Annerie is self ʼn brandoorlewende wat Sean sedert sy ongeluk met raad en ondersteuning bystaan.

Sean moet vir die volgende jaar nog elke dag vir ʼn paar uur lank spesiale kledingstukke aan sy bolyf en arm dra wat druk plaas op sy wonde om te verhoed dat te veel letsels vorm. Hy sal moontlik weer geopereer moet word sodat kortisoon in letsels in sy nek ingespuit kan word.

Hy kan ook nog nie albei sy arms behoorlik gebruik nie en Me-Lissa probeer nou iemand naby die huis vind wat vir hom fisioterapie kan gee. As die fisioterapie nie werk nie, sal hy weer ʼn operasie moet ondergaan in ʼn poging om weefsel los te sny wat moontlik weens die brand geheg het.

Hoewel hy nog soms pyn en ongemak verduur, is hy reg vir sy volgende stap om weer in te skakel in die samelewing.

“Hy wil egter net op ʼn plaas wees en in die buitelewe. Ons was onlangs op ʼn vriend se wildsplaas in die Pienaarsrivier-omgewing en dit het wondere vir sy gemoed gedoen. Hy bly net vra wanneer ons weer soontoe gaan. Hy is maar ʼn regte boertjie uitgeknip,” skerts Me-Lissa.

Lees vorige berigte oor Sean Smith op Maroela Media.

Dirkie van der Merwe. Foto: Verskaf

Twee mans is in hegtenis geneem in verband met die moord op Dirkie van der Merwe (82) van Ottosdal in Noordwes, byna ʼn jaar nadat haar liggaam op 27 Februarie 2016 in haar huis gevind is.

Sers. Kelebogile Moleko, polisiewoordvoerder, het aan Maroela Media gesê Joy Henneck (34) is Vrydag in verband met die moord in hegtenis geneem. Die tweede verdagte, Jorden Olihile (25), is Maandag in Ottosdal vasgestrek.

“Die twee verdagtes het Dinsdag in die Ottosdal-landdroshof verskyn. Hulle albei bly in polisieaanhouding tot hul volgende verskyning op 7 Februarie wanneer hulle om borgtog sal aansoek doen,” het Moleko gesê.

Sy het gesê Henneck en Olihile het Van der Merwe na bewering geken. Die twee sal op aanklagte van moord en huisroof tereg staan.

Andries Engelbrecht, Van der Merwe se skoonseun, het destyds aan Maroela Media gesê sy skoonma het alleen in ʼn huis op die dorp gewoon nadat haar man jare gelede dood is. Hy het gesê Engelbrecht se tuinwerker het die oggend van 27 Februarie onraad vermoed toe hy gesien het daar is geen beweging in die huis nie en dat die voordeur oopstaan.

Die tuinwerker is na die apteek in die dorp waar een van Van der Merwe se drie dogters, Laetitia, as apteker werk. Kort daarna het familielede op haar liggaam afgekom. Sy is vermoedelik die vorige aand versmoor en verwurg.

Kontant uit Van der Merwe se beursie, haar selfoon, trouring, horlosie en bronsmunte uit ʼn spaarvarkie was vermis.

Engelbrecht het Woensdag aan Maroela Media gesê die familie is baie verlig dat daar uiteindelik vordering met die saak gemaak is. Hy het gesê hy is nie seker of die verdagtes ook aan Van der Merwe se familie bekend is nie, maar hulle sal wel die hofverrigtinge bywoon om dit vas te stel.

“Dit was nou ʼn lang tyd van geduld en hoop, maar die speurtak het net bly sê ons moet nie moed verloor nie, die skuldiges sal wel opgespoor word. Ons is dankbaar teenoor die mense wat aan die saak gewerk het en steeds werk,” het hy gesê.

Qedani Mahlangu, LUR van gesondheid in Gauteng, het bedank.

Qedani Mahlangu, die LUR vir gesondheid in Gauteng, het bedank na aanleiding van ʼn verslag oor 94 psigiatriese pasiënte, wat in die sorg van nie-regeringsorganisasies (NRO’s) gesterf het, nadat hulle uit die Life Esidimeni-sentrum in Gauteng soontoe geskuif is.

David Makhura, premier van Gauteng, het Mahlangu se bedanking Woensdag in ʼn verklaring bekend gemaak. “Soos alle lede van die provinsiale uitvoerende raad, verstaan [Mahlangu] ten volle dat as iets ingrypend verkeerd gaan in die veld waarvoor jy verantwoordelik as uitvoerende owerheid, moet jy direk die verantwoordelikheid daarvoor aanvaar en nie die skuld op junior beamptes pak nie,” het Makhura gesê.

Prof. Malegapuru Makgoba, die gesondheidsombudsman, het Woensdag bekend gemaak minstens 94 psigiatriese pasiënte het tussen 23 Maart 2016 en 19 Desember 2016 in die sorg van NRO’s gesterf nadat hulle uit die Life Esidimeni-sentrum geskuif is en nie net 36 pasiënte, soos voorheen berig nie.

“Ek wil beklemtoon dit is net ʼn voorlopige getal en die werklike getal kan meer wees,” het Makgoba gesê tydens die bekendstelling van die langverwagte verslag oor die ondersoek na die psigiatriese pasiënte se dood. “Al 27 NRO’s, waarheen die pasiënte oorgeplaas is, is met ongeldige lisensies bedryf en daarom is al hierdie pasiënte in onwettige omstandighede dood.”

Mahlangu se departement het sy kontrak met Life Esidimeni na bewering oor ʼn tekort aan beskikbare fondse beëindig en die meer as 1 000 pasiënte by die sentrum is na NRO’s oorgeplaas. Altesaam 36 van hierdie pasiënte is binne drie maande na die oorplasing dood.

Mahlangu het in September verlede jaar, in antwoord op vrae van die Gautengse wetgewer, gesê 36 pasiënte is ná die oorplasings dood.

Makhura het gesê dr. Gwen Ramakgopa, die voormalige adjunk-minister van gesondheid en voormalige LUR vir gesondheid, sal in Mahlangu se plek aangestel word. Intussen sal Nandi Mayathula-Khoza, die LUR vir maatskaplike ontwikkeling, vir ʼn paar dae tydelik in Mahlangu se plek waarneem, totdat Ramakgopa as ʼn lid van die Gautengse wetgewer ingesweer kan word.

Dissiplinêre optrede

Makhura het Woensdag erken die verslag maak dit duidelik amptenare van die departement van gesondheid het nalatig en onbehoorlik opgetree tydens die oorplasing van die psigiatriese pasiënte, wat uiteindelik tot sommige pasiënte se dood gelei het. “Ek beskou die onbehoorlike en nalatige optrede van ons amptenare in ʼn baie ernstige lig, wat ernstige gevolge en verantwoordbaarheid tot gevolg moet hê,” het hy gesê.

Hy het gesê hy het die direkteur-generaal in die premierskantoor opdrag gegee om dadelik gepaste stappe te doen teen die amptenare wat in die ombudsman se verslag geïdentifiseer word.

Volgens Makhura sal dit onder meer die hoof van die departement en ander senior beamptes insluit. “Verdere aankondigings sal oor die volgende paar dae gemaak word oor die stappe wat teen hierdie amptenare, wat na bewering onvanpas of nalatig opgetree het, gedoen sal word,” het hy gesê.

Pasiënte weer geskuif

Makhura het verder gesê al die pasiënte wat tans in die sorg van NRO’s is, sal teruggeplaas word na staatsversorgingsfasiliteite en staatsinstansies wat hul spesiale behoeftes kan vervul. Hy het gesê die oorplasings sal binne die volgende sewe dae begin en sal binne 45 dae heeltemal afgehandel wees.

Families van die oorledenes blameer die departement omdat hulle die aanvanklike oorplasing van die pasiënte swak hanteer het en tot die dood van hul geliefdes gelei het. Sommiges sê hulle is nie in kennis gestel oor waar hul familielede is nie en is deur die departement van bakboord na stuurboord gestuur nadat hulle na die pasiënte begin soek het.

Hulle beskuldig ook die departement daarvan dat hulle nie onmiddellik oor die sterftes en die oorsaak van hul geliefdes se dood ingelig is nie.

Makhura gesê daar sal ook met die oorledenes se families geskakel word om hulle te help om berusting te kry na die tragiese dood van hul geliefdes.

“Ek wil beklemtoon dat ek dit ten diepste betreur en om verskoning vra vir die dood van ons medelandsburgers, wat pasiënte in die sorg van die provinsiale departement van gesondheid was. Gesondheid gaan daaroor om lewens te red en die omstandighede waaronder hierdie pasiënte dood is, is onaanvaarbaar.”

Drie tienermeisies het Maandagmiddag verdrink.

Drie tienermeisies het Maandagmiddag verdrink toe hulle saam in ʼn dam in Mpumalanga gaan swem het.

Brig. Leonard Hlathi, provinsiale polisiewoordvoeder, het gesê die meisies, onderskeidelik 13, 14 en 15 jaar oud, het omstreeks 14:00 saam met ʼn groep kinders in ʼn dam in Dludluma Trust in Tonga gaan swem.

“Volgens ʼn ooggetuie, wat saam met die groep was, het die meisies diep in die dam ingegaan, in die moeilikheid beland en onder die water verdwyn,” het Hlathi gesê.

Die kinders het hulp van die gemeenskap ontbied. Gemeenskapslede kon daarin slaag om twee van die meisies se liggame te vind. Die derde meisie se liggaam is deur polisieduikers gevind en uit die water gehaal.

Die oorledenes se familie het hulle reeds uitgeken. Die polisie doen ʼn geregtelike doodsondersoek.

Ruben (23 maande) en Ruan (6 maande) Foto: Facebook

Die son het nog nie in die ooste opgekom nie, dan herhaal Katinka Roodt haar daaglikse gebed. Sy vou haar hande saam en sluit haar oë: ‘Here, dankie dat ons leef en vir U genade. Here, my kinders het seer; hulle is nie gesond nie en dit was nog nooit maklik nie. Maar soos elke ander dag, weet ek U genade gaan hulle én vir my, omvou. Dankie dat ons gedra word en dankie vir die voorreg om hul ma te wees”.

Dié pad was in twee jaar nog nie een keer sonder duwweltjies nie. Empatiseer jy, keer sy vinnig: Daar is ander mense wat báie swaarder aan hul kruise dra en selfs vir hulle is die Here se genade ook genoeg.

Roodt en haar man, Pieter, se twee seuns, Ruben (23 maande) en Ruan (6 maande), het albei ʼn beenmurgoorplanting nodig.

Ruben was onder meer 54 dae in die intensiewesorgeenheid weens die sogenaamde “Pneumocystis jiroveci”-longontsteking, ʼn virus wat mense met ʼn baie swak immuunstelsel aanval.

Ruan, wat verlede jaar gebore is, is gebore met gastroskise, ʼn toestand waar die baba se ingewande aan die buitekant van sy lyf ontwikkel. In dieselfde tyd is Ruben vir die vierde keer in die hospitaal opgeneem en aan ʼn ventilator gekoppel.

Sy vertel hulle het geweet daar is gróót fout, want sy kon nie eens haar kind vashou voordat die dokter het hom dadelik weggeneem het nie.

“Hoe bly mens staan? Waaraan klou mens vas? Jy kan nie – jy word gedra deur die Here en deur engele. Nes dit begin lyk het asof Ruben se gesondheid verbeter, word hy weer dodelik siek. En Ruan se diagnose was vir ons ewe swaar. Toe kom ons ook daardeur met krag van Bo,” vertel sy.

Ruben (23 maande) en Ruan (6 maande) Foto: Facebook

Etlike maande later is die gesin se lewe wéér skielik omgekeer: Ruben en Ruan is albei met een van die seldsame immuungebrek, SCID (Severe Combined Immunodeficiency), gediagnoseer. Dié toestand word gekenmerk deur ʼn uiters swak immuunstelsel, wat mens vatbaar maak vir enige virus. Selfs die kleinste virus kan dodelik wees.

Roodt sê dié diagnose was ʼn groot terugslag vir die gesin. “My hart was gebreek. Ek kan my kinders nêrens heen vat nie, nie na die dieretuin toe nie en ook nie saam met hulle in ʼn sandput speel nie. Ek kan nie eens troeteldiere aanhou nie, omdat enige kiem hulle dodelik siek kan maak.

“Ek het aanvanklik gewroeg met vrae: Here, hoekom? Hoekom mý kinders? Maar dan maak Hy my hart rustig en ek weet dat alles oukei sal wees. Dan besef ek weer: my kruis is nie só swaar nie en ek is weer van voor dankbaar dat ek vir hulle kan lief wees.”

Ruben was so siek dat hy vandag, op 23 maande, presies dieselfde weeg as sy boetie.

Dokters het intussen gesê ʼn beenmurgoorplanting is al opsie om haar seuns te genees. Agt internasionale skenkers is vir Ruben opgespoor en twee skenkers in Suid-Afrika en 57 internasionaal vir Ruan.

Dié operasie kos R6 miljoen. Hoewel die mediese fonds aanvanklik goedkeuring geweier het, meen Roodt dit is “die Here se hand” dat hulle intussen R5, 3 miljoen vir die operasies beskikbaar gestel het.

“Dinge soos dié gebeur en dan jubel ek, want ek weet God is groot en ek weet Hy voorsien. Die ander R750 000 wat ons kort, is om die beenmurg vir Ruben na Suid-Afrika te bring, aangesien ons geen gepaste skenker vir hom in Suid-Afrika kon kry nie. As die Here vir ons R5,3 miljoen kon stuur, weet ek hy kan ons help met hierdie geld ook,” vertel sy.

Die oorplantings moet voor April vanjaar gedoen word, omdat die seuns se SCID-toestand sal veroorsaak dat hulle die hele winter dodelik siek in die hospitaal sal wees omdat hulle nie soos gesonde mense die kieme kan teenwerk nie.

Sy sê egter hulle is vol vertroue dat die Here weer sal voorsien. “Die Here het gesê Hy sal voorsien, daarom vertrou ons op Hom. En as die beenmurg hier aankom, bid ons weer kliphard en smeek weer by Hom dat sy liggaam nie die beenmurg verwerp nie. Ek glo in genade en ek glo dat my seuns ʼn normale lewe sal lei.”

ʼn Trustfonds is intussen in die seuns se naam gestig om te probeer fondse insamel vir die beenmurg.

Vir meer inligting, of om betrokke te raak, besoek Ruben en Ruan vir beenmurg op Facebook of die Roodt-gesin se Go Fund Me-blad.

Foto: SAPD

ʼn Rower is vroeg Woensdag by ʼn maatskaplike toelaag-betaalpunt in Embalenhle, naby Secunda in Mpumalanga, doodgeskiet nadat ʼn groep boosdoeners probeer het om een van die tellermasjiene op te blaas.

Brig. Leonard Hlathi, woordvoerder van die polisie, het gesê die voorval het by ʼn winkelsentrum in Embalenhle plaasgevind. “Nagenoeg 100 pensioenarisse het na die betaalpunt gegaan om hul maatskaplike toelae te ontvang,” het Hlathi gesê.

“ʼn Groep rowers met vuurwapens het na bewering die gebied bestorm en ʼn struweling het tussen ʼn veiligheidswag en een van die rowers ontstaan. Die veiligheidswagte en die rowers het skote geskiet en een van die rowers is doodgeskiet.”

Foto: SAPD

Hlathi het gesê een van die ander rowers het intussen reeds ʼn ontsteker in een van die tellermasjiene geplaas. Iemand het terselfdertyd ook die polisie ontbied.

“Toe die verdagtes sien die veiligheidswagte is opgewasse vir hul taak en die polisie is ontbied, het hulle in drie voertuie op die vlug geslaan. Die voertuie was twee Mercedes Benz-motors en ʼn silwerkleurige Audi. Die nommerplate is onbekend.”

Hy het gesê enigiemand met inligting oor die voorval word versoek om kapt. Mangondzweni Nkosi by 079 891 5324 te bel of die naaste polisiestasie te kontak.

Argieffoto: popista.com

WAARSKUWING: Die foto onderaan die berig is uiters grafies van aard en kan kinders en sensitiewe lesers ontstel.

ʼn Verdagte is in hegtenis geneem nadat die geskende karkas van ʼn witleeuwyfie Dinsdag op ʼn wildsplaas in die Alldays-omgewing gevind is.

Maroela Media het vroeër berig die leeu, waarvan die pote en kop verwyder was, is saam met twee ander leeus vergiftig voordat sy doodgemaak is. Iets het die verdagtes glo onderbreek, want hulle het begin om die vel te verwyder, maar was nie suksesvol nie en die ander twee leeus is nie gestroop nie. Die ander twee leeus kon weens die gif nie loop nie en moes behandeling van ʼn veearts ontvang.

Brig. Motlafela Mojapelo, polisiewoordvoerder, het Woensdag gesê ʼn 31-jarige man is in verband met die voorval in hegtenis geneem en die polisie het die leeu se pote en kop teruggevind.

Die verdagte moet binnekort in die hof verskyn.

Die polisie is op die spoor van die drie verdagtes en meer in inhegtenisnemings word verwag.

Maroela Media het vroeër berig drie leeus is verlede week op ʼn plaas suid van Polokwane in Limpopo doodgemaak en hul koppe en pote is verwyder. Dit is soortgelyk aan die sake wat vroeër ook in Tzaneen, Mara en Hoedspruit aangemeld is.

Die vlaag leeuslagtings in die provinsie hou moontlik verband met die plaaslike moetie-mark, wat dit onder meer verkoop.

Prof. Ray Jansen, medeprofessor in ekologie aan die Tshwane Universiteit van Tegnologie (TUT) en navorser by die Nasionale Dieretuin, het vroeër aan Maroela Media gesê hy is byna seker ʼn sindikaat is vir die voorvalle verantwoordelik.

“Groot katte word as baie kragtige moetie beskou en word al lank algemeen gebruik in tradisionele medisyne wat tradisionele genesers, sangomas en oudstes in landelike stamme in Suid-Afrika, Zimbabwe en Mosambiek voorberei,” het Jansen gesê.

Volgens Jansen glo gebruikers die moetie maak hulle magtiger as ander mense. Hulle dra die leeus se tande, skedel, kloue, pote, stukke van die skedel en velle.

“Die gebruikers glo dit maak hulle magtiger en dat dit bose geeste afweer. Hulle is oortuig daarvan dat hulle onkeerbaar is – onkeerbaar vir die polisie of enige elektriese heining of wapens.”

Hy meen daarom wend van die gebruikers die “bemagtiging” aan vir misdade, soos onder andere plaasaanvalle of renosterstropery.

WAARSKUWING: Die volgende foto is uiters grafies van aard en kan kinders en sensitiewe lesers ontstel.

Antonio Freitas. Foto: SAPD

Uitspraak is Woensdag gelewer in die borgtogaansoek van Antonio Freitas (55), die sakeman van Lephalale, wat in hegtenis geneem is in verband met die beweerde onwettige jag van renosters.

Brig. Motlafela Mojapelo, woordvoerder van die polisie, het gesê Freitas is op borgtog van R250 000 vrygelaat. Sy borgtogvoorwaardes sluit onder meer in dat hy nie die Lephalale-distrik sonder toestemming van die ondersoekbeampte in die saak mag verlaat nie, nie met enige getuies mag inmeng nie en ook sy twee paspoorte moet inhandig.

Freitas word ook verbied om die plaas Ringbult in die Steenbokpan-gebied binne te gaan. Die polisie het verlede week met ʼn soeklasbrief op die plaas toegeslaan en op sewe renosters se sterte, gedeeltes van hul bene en die renosters se vleis in vrieskaste afgekom. Renostervelle is ook op die plaas gevind.

Mojapelo het gesê die polisie ondersoek bewerings dat die renosters in November verlede jaar op die plaas doodgemaak en onthoring is. Die renosters is na bewering met vragmotors na die plaas gebring. Die polisie ondersoek nog waar die renosters vandaan gekom het.

Freitas sal op 2 Maart weer in die hof verskyn.

Argieffoto: Kent Williamson

Die liggame van drie mans is Woensdag naby ʼn gewilde winkelsentrum in Bloemfontein gevind.

Konst. Mosili Ntsika, polisiewoordvoerder, het gesê die polisie is omstreeks 08:45 na ʼn oop gebied naby die nuwe winkelsentrum in Bloemside ontbied, nadat ʼn verbyganger op die drie liggame afgekom het.

“Die drie liggame het langs mekaar gelê. Hulle het steekwonde aan hul bolywe gehad en al drie was kaalvoet,” het Ntsika gesê. Die mans is na raming tussen 16 en 21 jaar oud.

Die polisie ondersoek ʼn saak van moord. Die motief vir die moorde is nie bekend nie.

Die polisie het ʼn beroep op die publiek gedoen om met inligting na vore te kom, wat die polisie in hul ondersoek kan bystaan. Bel konst. Mosili Ntsika by 082 527 7135.

Argieffoto.

Sers. Sinah Mpakane, woordvoerder van die polisie, het gesê Puleng Gwadi is in die Botshabelo-landdroshof, buite Bloemfontein in die Vrystaat, tot 18 jaar tronkstraf gevonnis, waarvan ses jaar vir vyf jaar opgeskort is.

Gwadi is op 12 Julie 2015 in hegtenis geneem in verband met die dood van haar kinders. Die kinders is reeds in November 2010 dood en ʼn geregtelike doodsondersoek is aanvanklik gedoen.

Dit het na die ondersoek aan die lig gekom dat Gwadi haar drie kinders, onderskeidelik 10 maande en vier en agt jaar oud, die aand van 26 November alleen in ʼn plakkershut gelos het toe sy ʼn nagwaak gaan bywoon het.

Volgens Mpakane het Gwadi eers die volgende oggend teruggekeer en die plakkershut is intussen in ʼn brand vernietig. “Die polisie het vasgestel Gwadi is vroeër van haar man vervreem en sy het aan vriende gesê sy gaan wraak neem.” Gwadi het ʼn brandende kers in die hut gelos, wetende wat dit sou veroorsaak.

Polisiebeamptes by die verdagte. Foto: SAPD

Kapt. Stpehen Thakeng, woordvoerder van die polisie, het gesê die verdagte het op 5 Desember by ‘n dokter se spreekkamer in Wesselsbron, in die Vrystaat, ingebreek. “Die verdagte het deur die dak ingebreek. Hy het die alarmstelsel gedeaktiveer en met kontant gevlug.”

Volgens Thakeng het die verdagte egter een groot fout gemaak: hy het sy selfoon op die toneel agtergelaat en die polisie kon daarin slaag om die eienaar van die foon, Pasek Tsheisi, op te spoor.

Polisiebeamptes het die verdagte op 27 Januarie in hegtenis geneem, nadat hy aanvanklik probeer vlug het toe hy die beamptes se voertuig gesien het.

Die verdagte het reeds in die Wesselsbron-landdroshof verskyn op aanklag van sakeroof. Die saak is tot 7 Februarie uitgestel wanneer hy na verwagting om borgtog sal aansoek doen.

Foto: SAPD, Facebook

Kapt. Augustinah Selepe, woordvoerder van die polisie, het gesê twee van die vier mans het Dinsdagaand aan die voordeur van die man se huis in Lotus Gardens in Pretoria-Wes geklop. “Die twee swart mans het die huis binnegegaan en hulself as polisiebeamptes voorgestel. Die inwoner het die beampte se identifikasiekaarte gevra, waarna een van die verdagtes hom in die gesig geslaan het.”

Volgens Selepe het nog twee mans ewe skielik met kabelbinders die huis binnegekom. “Een van die verdagtes was ʼn wit man en het hom as ʼn polisiekaptein voorgestel. Hy het ʼn bruin leêr by hom gehad, wat hy as ʼn dossier voorgehou het.”

Selepe het gesê die verdagtes het die man na sy slaapkamer geneem, waar hulle onmiddellik die kamer begin deursoek het. “Die man kon uit die huis kom en het by sy bure hulp ontbied.”

Volgens Selepe kon twee verdagtes daarin slaag om te ontsnap, terwyl die ander twee verdagtes, die wit man en een van die swart mans, deur gemeenskapslede aangekeer is. Die verdagtes is glo hierna aangerand. “Een van die verdagtes is onder polisiebewaking in die hospitaal opgeneem, terwyl die ander verdagte in aanhouding is.”

Selepe het gesê die verdagtes, onderskeidelik 42 en 54 jaar oud, sal na verwagting Donderdag in die Pretoria-landdroshof verskyn.

Foto: Stad Kaapstad

Volgens die departement van waterwese en sanitasie, staan damvlakke nasionaal op 55%. Verlede jaar hierdie tyd was dit 55,4%. “Dit is duidelik dat die onlangse reënval nie ‘n groot impak gemaak het op die land se damme nie en ons is steeds in ‘n droogte,” het Sputnik Ratau, woordvoerder van die departement, gesê.

Damme in die Oos-Kaap is 57,7% vol, in die Wes-Kaap 37,9%, in KwaZulu-Natal 47%, in die Vrystaat 56,7%, in Gauteng 86,6%, in Limpopo 63,7%, in Mpumalanga 65,9%, in Noordwes 73,2% vol en in die Noord-Kaap 93,7%.

Volgens Ratau het die Vaaldam se vlak gestyg van 63,2% verlede week tot 63,4% vandeesweek. Die Vaaldam was in ‘n stadium verlede jaar slegs 26% vol. Daar is vroeër water van die Sterkfonteindam na die Vaaldam deurgelaat.

Die ses damme wat water aan Kaapstad verskaf, se watervlak was verlede week 40% en het vandeesweek tot 38,5% geval. Die Algoa-stelsel, wat uit vyf damme bestaan en water aan Nelson Mandelabaai verskaf, se damvlakke was 54,8% verlede week en het vandeesweek tot 57,2% gestyg. Die stelsel was egter in die ooreenstemmende tydperk verlede jaar 93,1% vol.

Die Amatole-stelsel, wat uit ses damme bestaan en water aan die Buffalo City-metro verskaf, se watervlakke was verlede week 72,7%, maar het vandeesweek tot 72,4% gedaal. Die Umgeni-stelsel, wat uit vyf damme bestaan en water verskaf aan eThekweini en Msunduzi, se watervlakke was 48,7% verlede week en is vandeesweek steeds dieselfde.

Die Bloemfontein-stelsel, wat uit vier damme bestaan en water aan die Mangaung-metro verskaf, se watervlakke was 37,9% verlede week en is steeds onveranderd. Die Polokwane-stelsel se watervlakke was verlede week 48,7% en is ook steeds dieselfde.

Ratau het gesê weervoorspellers meen buitengewone reënval kan tot einde Maart verwag word.

Internasionale Strafhof in Den Haag (Foto: Asser Institute)

Senegal en Nigerië het beswaar gemaak teen die nie-bindende resolusie wat die beroep doen. Suid-Afrika en Burundi het albei reeds besluit om te onttrek en het die strafhof daarvan beskuldig dat hy hul soewereiniteit ondermyn en Afrika onregverdig teiken.

Die strafhof het egter die beskuldigings ontken. Die AU se beroep, om aan die strafhof te onttrek, kom na ʼn beraad in Addis Ababa in Ethiopië, wat Dinsdag tot ʼn einde gekom het. Omar Al-Basjir, Soedan se president, het ook die beraad bygewoon. Die strafhof het vroeër ʼn lasbrief vir sy inhegtenisname uitgereik en sy teenkanting teen die strafhof is welbekend.

Suid-Afrika het geweier om Al-Basjir in hegtenis te neem tydens sy besoek aan die land in Junie 2015, toe hy die Afrika-Unie se beraad in Johannesburg bygewoon het. Die Suider Afrikaanse Litigasiesentrum (SALC) het ʼn hofaansoek gebring om al-Basjir in hegtenis te laat neem op grond van die strafhof se lasbrief vir sy arrestasie. Die regering het hom egter nie in hegtenis geneem nie en ʼn hof het hom opdrag gegee om in die land te bly totdat oor sy inhegtenisneming besluit kan word. Nadat die hof beveel het al-Basjir moet in hegtenis geneem word, is vasgestel hy het reeds die land verlaat.

Die appèlhof het later die Suid-Afrikaanse regering se versuim, om al-Basjir in hegtenis te neem, as “skandelike gedrag” beskryf. Die Suid-Afrikaanse regering het einde Junie 2015 gesê hy sal oorweeg om hom van die internasionale strafhof te onttrek as ʼn “laaste opsie” oor die Al-Basjir dispuut. Suid-Afrika het in Oktober met die proses begin om aan die strafhof te onttrek.

ʼn Totaal van 34 Afrika-lande is deel van die strafhof.

Argieffoto

Die brief volg nadat dit onder Solidariteit se aandag gekom het dat Vodacom klaarblyklik ʼn gedeelte van sy aandele in die Openbare Beleggingskorporasie wil terugkoop en dit deur middel van ʼn spesiale maatskappy eksklusief aan swart aandeelhouers beskikbaar wil stel.

Na berig word, word die waarde van die beoogde transaksie op ongeveer R15 miljard geraam, wat dit een van die grootstes van sy soort in die Suid-Afrikaanse geskiedenis sal maak.

Vodacom het reeds in 2008 ʼn groot SEB-transaksie ten bedrae van R7,5 miljard gesluit. YeboYethu Limited, ʼn spesiale maatskappy wat Vodacom SA-aandeelhouding eksklusief ten bate van swart individue en maatskappye besit, vorm deel van die transaksie.

Volgens Johan Kruger, adjunk uitvoerende hoof van Solidariteit, sluit hierdie soort transaksies klaarblyklik mense, wat nie as swart geklassifiseer word nie, uit sekere SEB-aandeleskemas uit en dit kan met die oneweredige toekenning van aandele volgens ras in werknemersaandeleskemas (ESOPs) gepaard gaan, waaroor Solidariteit bekommerd is.

“As dié gerugte waar is, sal Solidariteit nie huiwer om verdere stappe te doen en mobiliseringsveldtogte teen die transaksies te loods nie,” sê Kruger.

Ashley by die hospitaal met Bart wat in haar oorgaatjie vassit. Foto: Facebook

Die BBC berig Ashley Glawe het ‘n foto op Facebook gedeel van die klein luislangetjie wat in die oorbelgaatjie in haar oorlob vassit. Sy het by die foto geskryf dit was by verre een van die “malste” oomblikke van haar lewe.

Volgens Glawe was sy besig om met die slang, genaamd Bart, te speel, toe hy skielik in die gat in haar oorlob ingeseil het. “Dit het so vinnig gebeur en nog voor ek besef het wat aangaan, was dit klaar te laat.”

Glawe het gesê dokters het haar oor verdoof, die gat groter getrek en smeerjel aan die slang gesmeer om hom uit die gat te kry. Volgens Glawe is sy en Bart ongedeerd.

Die foto en inskrywing word intussen wyd op sosiale media gedeel.