Anika Smit

André van Wyk (24), wat aangekla word van die moord op Anika Smit (17), het nie Vrydag in die Pretoria-Noord-landdroshof verskyn nie.

Die staatsaanklaer het in Van Wyk se afwesigheid versoek dat hy vir ʼn verdere 20 dae vir waarneming in die Weskoppies-psigiatriese hospitaal bly. Die verdediging het nie die versoek teengestaan nie en gesê dit is in belang van geregtigheid.

Die saak is hierna tot 15 Desember uitgestel vir die afhandeling van die ondersoek. ʼn Verslag oor Van Wyk se sielkundige toestand sal na verwagting ook dan gereed wees.

Van Wyk, wat teregstaan op aanklagte van moord, verkragting en lykskending, se ouers was Vrydag in die hof.

Hy is tydens sy vorige hofverskyning, op 26 September, na ʼn psigiatriese hospitaal verwys vir sielkundige waarneming. Die hof het egter op 25 Oktober gehoor ʼn bed by die Weskoppies-psigiatriese hospitaal het eers onlangs beskikbaar geraak en hy is toe vir die 30 dae waarneming gestuur.

Van Wyk, wat saam met Anika op skool was, is op 22 September deur ʼn staatsgeneesheer by die Pretoria-Noord-kliniek ondersoek, waartydens hy aangedui het hy het geheueverlies en kan nie onthou wat tydens Anika se moord gebeur het nie.

Van Wyk tydens sy vorige verskyning in die hof. Sy ouers sit skuins agter hom. Foto: Phillip Bruwer

Die staatsgeneesheer het aanbeveel Van Wyk moet behoorlike waarneming ondergaan en was van mening dat Van Wyk die erns van die aanklagte teen hom verstaan, asook die gevolge van ʼn moontlike skuldigbevinding. “Hy kan nie beskryf wat tydens die voorval gebeur het nie en beskryf nie die relevante feite nie. Hy het geheueverlies oor die voorval en ontken hy sien drogbeelde of hallusineer,” lui die verslag.

Anika is op 10 Maart 2010 in Theresapark, in die noorde van Pretoria, vermoor. Die moordenaar het albei haar hande afgesny en dit van die toneel verwyder. Sy is ook seksueel aangerand en het verskeie steekwonde aan haar liggaam gehad. Haar hande is nooit gevind nie.

Van Wyk het hom op 17 September aan die polisie oorgegee, ná ʼn lang geregtelike doodsondersoek in ʼn poging om haar moordenaar te vind. Anika se pa, haar destydse kêrel en nog ʼn man, wat saam met haar op skool was, was belanghebbendes wat in die ondersoek getuig het. Dié ondersoek is intussen onbepaald uitgestel, hangende die uitkoms van Van Wyk se verhoor.

Lees alle vorige berigte oor Anika Smit op Maroela Media.

Esbé Koster. Foto: Verskaf

Esbé Koster (50), die vrou van Brits wat Dinsdag langs die Ou Lethlabile-pad naby Brits, Noordwes, met ʼn skietwond in haar kop gevind is, “sou enigiets gedoen het” vir die kinders van die skool waar sy gewerk het. Ironies genoeg is twee leerders van dieselfde skool Woensdag in verband met haar moord in hegtenis geneem.

“Esbé was ʼn ongelooflik saggeaarde mens. Sy sou nie eens terugbaklei het nie. Sy sou net [vir haar aanvallers] gesê het vat maar die motor,” het Amelda Ferreira, Koster se jonger suster, gesê. Sy vertel Koster het ses jaar lank as sekretaresse by die Rabboni Christian School gewerk.

“Sy het al die jare by die bank gewerk, maar het op ʼn dag besluit dit is nou tyd vir ʼn verandering en toe by die skool begin werk. Dit was aan die begin vir haar ʼn aanpassing, maar sy het vinnig so geheg aan die skool en die kinders geraak,” het Ferreira vertel. “As ʼn laerskoolkind seergekry het, het sy maar ʼn pleister geplak en getroos. Sy was so mal oor die kinders. En sy sou die onderwysers ook met enigiets help, of dit nou haar werk was of nie.”

Ferreira skerts dat sy nooit saam met Koster inkopies wou gaan doen nie, omdat dit hulle ure gevat het om weer by die huis te kom. “ʼn Inkopietog saam met haar het ure geneem om af te handel. Sy het almal geken en almal wou altyd eers met haar ʼn geselsie aanknoop. Sy was ʼn baie geliefde lid van die gemeenskap,” het sy gesê.

Volgens Ferreira weet die familie nog nie wat presies gebeur het die dag wat Koster vermoor is nie. “Ons vermoed dit moes net na skool gebeur het. Haar man, Jan, het 17:00 by die huis gekom, maar sy was nie daar nie. Hy was dadelik bekommerd, want sy is altyd by die huis as hy daar aankom,” het Ferreira gesê.

Sy vertel iemand het op die buurt se Whatsapp-groep gesê ʼn liggaam is langs die pad gevind. Jan het daarop geantwoord deur te sê hy weet nie waar Koster is nie. Een van die bure is na die toneel om die liggaam uit te ken en het Jan in kennis gestel dat dit sy vrou se liggaam is wat gevind is.

Koster het ʼn skietwond aan haar kop gehad. Sy het steeds haar juwele aangehad, maar haar motor was skoonveld.

Twee leerders, onderskeidelik 16 en 17 jaar oud, is Woensdag by die skool in hegtenis geneem. Hulle het Donderdag in die plaaslike landdroshof verskyn, waar die saak tot 30 November uitgestel is. Die seuns sal intussen in ʼn jeugoortreder-sentrum in Rustenburg aangehou word.

“My ouers is in hul laat 70s. Ek weet nie hoe hulle ooit hieroor gaan kom nie,” het Ferreira gesê. “Esbé het twee dogters, onderskeidelik 21 en 27 jaar oud. Een van hulle gaan binnekort ʼn mamma word en nou moet sy dit sonder haar ma doen. Dit is ongelooflik hartseer.”

Ferreira het gesê hoewel sy self sukkel om haar suster se dood te hanteer, sal sy in die hof wees wanneer die verdagtes weer verskyn. “Ek wil hulle in die oë kyk. Daar is nie veel meer wat ek kan doen nie, maar dít gaan ek doen. Ek is verskriklik kwaad. Ek huil van hartseer en woede dat hulle iemand kon wegvat wat net goed vir ander was.”

Lees alle vorige berigte oor Esbé Koster op Maroela Media.

Argieffoto

Met minder as twee weke voor die skole vir die Desembervakansie sluit, moet ouers van ʼn laerskool in die hoofstad dringend planne beraam om in 2017 Afrikaanse onderrig vir hul kinders te bekom.

Laerskool Meyerspark, in die ooste van Pretoria, het Saterdag by ʼn algemene jaarvergadering aangekondig Afrikaans as onderrigmedium by die skool gaan vir gr. 2 tot 6 wegval. Die skoolure sal ook verleng word van 07:30 tot 16:00 en die skool se uniform en embleem moet ook verander, omdat dit ʼn Afrikaanse leuse bevat. Die naam van die skool sal na Meyerspark Maths Science and Technology School verander word.

Volgens die ouers het dié vergadering in chaos ontaard, toe sekere ouers nie die mosie vir die veranderinge wou aanvaar nie. Van die ouers is ook nie ʼn kans gegun om beswaar te maak nie en die stemme teen die mosie is nie getel nie.

“Ek weet nie hoe hulle op grond hiervan ʼn besluit kan neem nie. Ons word geboelie en Afrikaanse mense beteken nou niks,” sê Yolande, ʼn ouer van ʼn gr. 2-dogtertjie wat nie haar van wil bekendmaak nie om haar kind se identiteit te beskerm. “My dogtertjie huil haarself elke aand aan die slaap. Sy weet nie hoe sy volgende jaar in Engels gaan skoolgaan nie.”

“Toe ek my kinders in 2011 ingeskryf het, het die skool gesê hulle sal hul onderrig in Afrikaans kan voltooi, maar dat die taal wel as onderrigmedium uitgefaseer sal word. My gr. 6-seun sal sy gr. 7 in Afrikaans kan voltooi, want daar is nog 31 Afrikaanse kinders in dié klas, maar die res van die grade se Afrikaanse kinders sal vanaf 2017 in ander klasse ingedeel word.

“Die skool moes ons vroeër in die jaar al aangeraai het om ander planne te maak, of voorbereidingsklasse vir Afrikaanse kinders aangebied het, maar niks van die aard is gedoen nie. Wat doen ons nou twee weke voor die einde van die jaar?” het Charlene Janse van Rensburg, ʼn ma van ʼn twee Meyerspark-leerlinge, gesê.

“Ek veg tans vir my kind se reg om in Afrikaans skool te gaan. My kind sal volgende jaar die enigste Afrikaanssprekende in ʼn klas van 29 Engelse kinders wees en dit is onaanvaarbaar,” het Elsa Combrinck, nog ʼn bekommerde ouer van ʼn gr. 2-leerling gesê.

Laerskool Meyerspark se embleem soos dit tans lyk gaan binnekort verander. Foto: Rainbowgr.com

Volgens Combrinck is die skool ook tans in ʼn stryd rondom taxi-roetes gewikkel en word eise gestel rondom watter taxi’s as vervoer gebruik moet word vir kinders wat van Mamelodi en Eersterus af kom.

Maroela Media het vandeesweek verskeie e-posse ontvang van Afrikaanssprekende ouers wat bekommerd is oor hul kinders se toekoms by Laerskool Meyerspark. Van die ouers het al navraag by naburige Afrikaanse skole gedoen, maar die skole is reeds vol en sal nie hul kinders vir 2017 kan huisves nie.

Werner Human, ʼn prokureur van Hurter Spies, wat by verskeie hofsake van skole betrokke is, is genader oor die besluite van Laerskool Meyerspark, maar meen nog baie relevante inligting oor die saak is uitstaande.

“My gevoel is egter dat dit wel ʼn baie drastiese besluit is en vrae moet gevra word rondom watter prosesse die skool gevolg het en of daar behoorlike konsultasie met die ouers was.”

Laerskool Meyerspark se hoof het alle media-navrae na die Gautengse departement van onderwys verwys. Dié departement kon nie onmiddellik vir kommentaar bereik word nie, maar Maroela Media het wel ʼn e-pos ontvang waarin die departement ontvangs van die ouers se klagtes erken.

Die skool bestaan tans uit 1 297 leerlinge, waarvan 164 Afrikaanssprekend is en het tot dusver parallelmediumonderrig verskaf.

Bekommerde Afrikaanse ouers van Laerskool Meyerspark het komende Saterdag ʼn vergadering met die Federasie van Beheerliggame van Suid-Afrikaanse Skole (Fedsas) en Hurter Spies waartydens hulle sal vasstel watter stappe gedoen kan word teen die skool se besluite.

Christopher Panayiotou (heel regs met sy rug na die kamera) en sy twee medebeskuldigdes, Sinethemba Nenembe en Zolani Sibeko in die beskuldigdebank in die hooggeregshof in Port Elizabeth (17 Oktober 2016) Foto: ANA

Die hooggeregshof in Port Elizabeth het Donderdag gehoor die staat het ʼn bandopname van ʼn gesprek tussen Luthando Siyoni, die beweerde middelman in die huurmoord van Jayde Panayiotou en Christopher Panayiotou, die beweerde baasbrein agter die moord.

Adv. Marius Stander, die staatsaanklaer, het gesê die staat beplan om ʼn nuwe hoofstuk van sy saak te begin. Die nuwe hoofstuk behels die bewyse wat glo vervat is in ʼn bandopname van ʼn gesprek tussen Siyoni en Panayiotou. Die gesprek is op 29 April verlede jaar opgeneem tydens ʼn geheime polisieoperasie.

Siyoni het vroeër getuig die polisie het hom gedwing en “gedreig” om Panayiotou te bel as deel van die operasie. Hy beweer hy is aangesê om sy samewerking te gee of tronk toe te gaan. Siyoni het vir Panayiotou gewerk as ʼn uitsmyter by sy Infinity-nagklub.

“Hulle het gesê ek moet Chris kry om te erken [hy was by sy vrou se moord betrokke], sodat daar ʼn rede is om hom in hegtenis te neem, omdat ek geld by hom gekry het,” het Siyoni aan die hof gesê.

Die polisie het vir Siyoni gesê wat om vir Panayiotou te sê en ná talle telefoonoproepe het die twee mans uiteindelik by ʼn vulstasie ontmoet. ʼn Bandopnemer is in Siyoni se voertuig geplaas en hy het Panayiotou oortuig om saam met hom in sy motor te sit.

Die polisie beweer hierdie ontmoeting is gereël omdat Siyoni die inligting, wat hy vroeër aan die polisie gegee het, wou verifieer. Siyoni het uiteindelik staatsgetuie geword, maar is verlede week as ʼn vyandige getuie verklaar nadat hy ʼn skielike ommekeer gemaak en sy vorige weergawe van gebeure aan die polisie ontken het.

Die verdediging vra die hof om die bandopname wat deur die polisieoperasie bekom is, as ontoelaatbaar te verklaar. ʼn Verhoor binne ʼn verhoor sal vandag begin, wanneer die staat en die verdediging mekaar sal aanvat oor die toelaatbaarheid van die bewyse.

Vandag is die 32ste dag van die lang moordverhoor. Die staat beweer Panayiotou het Siyoni betaal om ʼn huurmoordenaar, Sizwe Vumazonke, te kry om Jayde te ontvoer en te vermoor. Die staat beweer Sinethemba Nenembe het Vumazonke gehelp om die moord uit te voer. Zolani Sibeko het na bewering ook ʼn rol in die uitvoering van die moord gespeel. Vumazonke is vroeër vanjaar in aanhouding dood.

Twee polisiebeamptes wat vandeesweek moes getuig, was nie beskikbaar nie, nadat hulle in ʼn motorongeluk betrokke was.

Lees alle vorige berigte oor Christopher Panayiotou op Maroela Media.

Volgens die polisie se jongste misdaadstatistieke was daar van 1 April 2015 tot 31 Maart 2016 meer as 7 300 aangemelde kapings in Gauteng. ʼn Lys is intussen beskikbaar gemaak van sogenaamde hoërisiko-kapingsareas.

Die lys is deur die National Hijack Prevention Academy bekend gemaak.

Volgens dié liggaam is die volgende areas in Pretoria hoërisiko-kapingsareas:

• Paul Krugerstraat
• Die R55 in Erasmia
• Burnettstraat, Delfilaan en Garsfonteinweg
• Die verkeersligte in Stormvoëlweg
• Die verkeersligte in Watermeyerstraat
• Die verkeersligte in Nelson Mandelarylaan
• Die kruising van Lynnwoodweg en Simon Vermootenrylaan
• Die kruising van Lynnwoodweg en Hans Strijdomrylaan
• Die verkeersligte in Walkerstraat
• Die verkeersligte in Duncanstraat
• Die kruising van Lynnwoodweg en Universiteitsweg
• Die Rigel-afrit op die N1
• Die kruising van Simon Vermootenweg en Pretoriastraat
• Die kruising van Simon Vermootenweg en Farrowstraat
• Die kruising van Simon Vermootenweg en Lynnwoodweg
• Die Lynnwoodweg-afrit op die N1
• Die Hans Strijdomrylaan-afrit op die N4
• Die kruising van Hans Strijdomrylaan en die R21
• Die Atterburylaan-afrit op die N1
• Die kruising van Schoeman- en Duncanstraat
• Die kruising van Schoeman- en Hildastraat
• Die kruising van Schoeman- en Grosvenorstraat

Hoërisiko-kapingsareas in Johannesburg:

• Die hoek van Kelvin- en CR Swartstraat
• Die hoek van Pretoriaweg en CR Swartstraat
• Die hoek van Elgin- en Pretoriaweg
• Die Linksfieldweg-afrit op die N3
• Die Booysensweg-afrit op die M1
• Die Nelson Mandelabrug
• Wolmaransstraat tussen Claim- en Nuggetstraat
• Die hoek van Harrowweg en Saratogalaan
• Die hoek van Harrowweg en Abelstraat
• Die Houghtonrylaan-afrit op die M1
• Die hoek van Jan Smutsrylaan en St. Andrews
• Die hoek van Krause- en 17de Straat
• Die Heidelbergweg-afrit op die N17
• Die verkeersligte in Kyalamiweg
• Die Beyers Nauderylaan-afrit op die N1
• Die Rivoniaweg-afrit op die N1 in Sunninghill
• Die kruising van Grayston- en Rivoniaweg en die kruising van Graystonweg en 11de Straat.
• Empireweg-afrit op die M1
• Jan Smutsrylaan/William Nicolweg in Hydepark
• Witkoppenweg
• Bramley
• Die kruising tussen Christiaan de Wetrylaan en Wilgeroodweg in Roodepoort
• 11de Laan in Fairland
• New Roadweg-afrit op die N1
• William Nicholweg-afrit op die N1

Die brande in Haifa. Foto: Xinhua/Moran Mayan/JINI) (zjy)

Daar word intussen ook steeds gepoog om talle ander brande regoor die land onder beheer te kry. Die brande het op verskeie punte regoor Israel begin. Benjamin Netanyahu, premier van Israel, het die brandstigters as terroriste bestempel.

Die brande word aangehelp deur sterk wind en baie droë weer. Palestyne het blykbaar die brande op sosiale media gevier met die Twitter-hutsmerk #Israelisburning. Netanyahu het hulp gevra van die VSA om hul “supertanker”, ʼn groot brandbestrydingsvliegtuig, te stuur. Verskeie lande het reeds hulp aangebied.

Die hoofweg tussen Jerusalem en Tel Aviv het tot stilstand gekom nadat brande die stad Modi’in-Maccabim-Re’ut bereik het. Verskeie huise en geboue het reeds afgebrand. Geen sterftes is tot dusver aangemeld nie, maar tientalle mense is in weens rookinaseming in hospitale opgeneem.

Minstens 12 mense is reeds in verband met die verwoestende brande in hegtenis geneem.

‘n Skermskoot uit die video van die toiletbesoeker. Die video volg onderaan die berig.

ʼn Kobra van nagenoeg 2,3 m laat inwoners van ʼn woonstelblok in Pretoria twee keer in die toilet loer nadat dié gedierte Donderdag sy kop daar uitgesteek het.

Barry Greenshields (31), ʼn ervare slangvanger van Pretoria, het Vrydag aan Maroela Media gesê hy is omstreeks 09:00 ontbied na die woonstelblok in Ilkleyweg in Lynnwood Glen, naby die Menlyn Park-winkelsentrum in die ooste Pretoria, nadat ʼn inwoner die slang in sy toiletbak opgemerk het.

“Die inwoner het aanvanklik gedink dit was ʼn pofadder, maar toe ek daar aankom en die deksel oopmaak toe sien ek dit is ʼn kobra. Ek het eers nie geweet watter soort kobra dit was nie en het vir sonbrille gevra, sou dit ʼn spoegkobra wees, om die slang van nader te beskou. Dit is toe dat ek sien dit is ʼn wipneuskobra ook bekend as ʼn Egiptiese kobra.

Greenshields het gesê dié slange kan tot 2,6 m lank word en hy skat die troonbesoeker was minstens 2,3 m.

“Ek het my grypstok gebruik en begin om die slang uit die toiletbak te trek. Ek het ʼn lang gedeelte van die slang uitgekry, maar die agterlyf moes aan iets vasgehak of vasgeklou het, want dit wou net nie verder uitkom nie. Ek wou ook nie te hard trek of die slang vasknyp nie want ek wou dit nie seermaak nie. Ek het in ʼn stadium die greep van grypstok laat vaar en die slang het dadelik teruggetrek en in die toiletpyp verdwyn en is skoonveld.”

Greenshields en ʼn kollega is later die middag terug na die drieverdieping woonstelblok waarin daar 20 eenhede is. “Hoewel dit ʼn drieverdieping gebou is, is daar slegs parkeerplekke op die grondvlak, so daar is net wooneenhede op die eerste en tweede vloer.”

Hy het gesê hy en ʼn kollega het tot laataand by al die eenhede gaan aanklop en in die mense se toilette gaan soek na enige spoor van die slang. Hulle het ook alle mangate en dreine op die grondvlak deursoek, maar daar was geen spoor van die slang nie.

“Daar is baie pype onder die gebou en die moontlikheid bestaan dat die slang in die dreineringstelsel verdwyn het. Ons het egter al die inwoners aangeraai om hul toiletdeksels toe te hou en mooi te kyk as hulle dit oopmaak.”

Hy het gesê dit is nie ongewoon dat kobras in Pretoria voorkom nie en dat hy al vanjaar ʼn hele paar gevang het, veral in die Silwer Lakes-omgewing.

“Hulle hou van droë bedompige omstandighede en eet veral paddas, akkedisse, muise, rotte, eiers en ander slange. Hulle is baie giftig en mense wat gepik word kan weefselskade opdoen.”

Sy raad aan inwoners wat dié of enige ander slang opmerk, is om nie self te probeer om die dier te vang nie en dop te hou waar dit skuil. Bel hom dan dadelik by 074 269 3023.

Die inwoners wat Greenshields ontbied het, het ʼn video van die seilende toiletbesoeker geneem en op sosiale media gedeel. Die video het inwoners van die ooste van Pretoria aan die gons. Sommiges skerts dat hulle veld toe sal gaan as die nood druk, terwyl ander weer gaan seker maak hulle het genoeg medisyne in die huis om maagwerkings te voorkom.

[This post contains video, click to play]

Van die uitsigte op die trein.

Ouwêreldse bekoring ontmoet moderne gasvryheid. Só kan die ATKV se nuwe treintoere in ʼn neutedop beskryf word.

Die trein vertrek uit Johannesburg en reis via Krugersdorp, Potchefstroom, Klerksdorp, Kimberley, De Aar, Beaufort Wes en Laingsburg na Worcester. In Worcester haal jy ʼn bus na die ATKV-Goudini Spa-oord wat teen die majestueuse Bolandse berge naby Rawsonville geleë is met prentjiemooi uitsigte van die berge, wingerde en Kaaps-Hollandse huise.

Tussen stasies

Ons het die Sondagmiddag sak en pak by die Klerksdorp-treinstasie gewag. Die trein was effe laat maar dit het nie ons gees gedemp vir dié avontuur wat op ons gewag het nie.

Nadat ons ons rustig tuisgemaak het in ons kajuit is ons na die eetsaal vir ʼn koue lafenis. Vir ʼn oomblik was dit stil. Net die klik-klik, klak-klak van die trein op die spoor, met die een na die ander landskap wat verby ons flits.

Daar is nie elektrisiteit in die kajuite nie en dit verg moeite om jou selfoon vir eers eenkant te stoot en net alles om jou in te neem. Stasie na stasie raak jy al rustiger. Mense op die trein gesels vriendelik en die opgewondenheid is tasbaar.

Die Shosholoza Meyl is beslis nie Rovos Rail of die Bloutrein nie maar beskik oor die nodigste.

ʼn Hoogtepunt van die treinrit is beslis die vier Hexrivier-tonnels waardeur die trein ry voor jy kort daarna in Worcester aankom. Vir ʼn afstand van 30 km ry die trein amper vir 17 km onder die grond. Die langste treintonnel is amper 14 km lank.

ATKV Goudini Spa

ATKV-Goudini Spa

Op die Worcester-stasie aangekom gryp almal hul bagasie en ons klim op die bus. Die dorp, in die hart van die Breëriviervallei en waar wingerdboerdery die hartklop is, is natuurlik ook bekend vir die De La Bat Skool vir Dowes en die Pionier Skool vir Blindes. Kort voor die oord draai ons in by Du Toitskloof-wynkelder, wat op die Breedekloofwynroete is, in vir ʼn lekker wynproe met die Du Toitskloofberge soos ʼn  skildery voor jou.

By die ATKV-Goudini Spa kry ons ons kamersleutels en die vakansiegevoel begin behoorlik inskop. Die oord met sy helende mineraalbaddens bied ʼn ietsie vir almal. Buite- en binnenshuise swembaddens, ʼn waterwurm en wipmatte, mini-gholf, staproetes, tennis en vlugbal en ʼn speletjiesarkade. Daar is ook ʼn spa waar jy die laaste bietjie stadstres kan laat uitvryf.

Die toer sluit ook ʼn dagbesoek aan Franschhoek en Stellenbosch in. Franschhoek, omring deur berge en wingerde, staan ook bekend as die “kos-en-wynhoofstad” van Suid-Afrika en hy doen sy naam gestand.

Die asemrowende Du Toitskloofberge.

Ander besienswaardighede sluit in die Hugenotemonument en die nabygeleë Hugenotegedenksentrum en wees nuuskierig as jy rondsnuffel, want die dorp is vol unieke winkels om te ontdek.

Die studentedorp Stellenbosch se omliggende omgewing spog met van die beste wynkelders in die land en ook topklas-restaurante. Daar is ook die aarbeiplaas, lekker kuierplekke, alles omring met berge wat stories vertel.

Op die laaste dag voor ons weer met die trein na Johannesburg vertrek, het ons by die Kleinplasie-opelugmuseum in Worcester besoek afgelê.

Kort voor jy weer by jou bestemming afklim besef jy met ʼn effense skok: Die lewe het toe nie gaan stilstaan in tyd soos jy gedink het nie. En met die afklimslag vat jy jou reistas, maar ʼn stukkie van jou hart bly op die treinspoor agter.

Oor die toere:

Die treintoere word deur die ATKV en JB Treintoere aangebied. Besoek ATVK se webtuiste hier vir meer inligting of JB Treintoere hier.

Ané Jacobs. Foto: Facebook

Meer as drie weke nadat Ané Jacobs, ʼn tienermeisie van Alberton, se halfnaakte liggaam in ʼn veld gevind is, is niemand nog in verband met dié gru-moord in hegtenis geneem nie.

Kapt. Mavela Masondo, woordvoerder van die polisie, het Vrydag aan Maroela Media gesê die polisie is steeds besig met hul ondersoek na die moord en kon geen verdere besonderhede bekendmaak nie.

Maroela Media het vroeër berig Ané (16) se halfnaakte liggaam is op 1 November in ʼn veld naby ʼn sokkerklub in Alberton gevind, nadat sy die Saterdagaand vermis geraak het. Sy het kneuswonde aan haar gesig gehad en haar grimeersakkie is ʼn paar meter weg van haar liggaam gevind. Haar liggaam is vermoedelik gesleep tot daar waar dit gevind is.

Fred Albrecht, Ané se oom wat as woordvoerder van die familie optree, het Vrydag aan Maroela Media gesê die familie sal binnekort met die polisie se ondersoekspan vergader om oor die vordering met die ondersoek te praat. Volgens Albrecht is daar aan hulle gesê dat die ondersoekbeampte reeds die uitslae van die forensiese ondersoek ontvang het, maar die uitslae is nog nie met die familie gedeel nie.

Anthea Jacobs, Ané se ma, het vroeër aan Maroela Media gesê Ané was die Saterdagaand saam met vriende uit. Toe Anthea die Sondagoggend wakker word, het sy gesien Ané is nie tuis nie. Sy het familie en Ané se vriendinne gekontak in ʼn poging om haar op te spoor en later is ʼn volskaalse soektog van stapel gestuur.

ʼn Verbyganger het Dinsdag op haar liggaam in die veld afgekom.

Lees alle vorige berigte oor Ané Jacobs op Maroela Media.

Argieffoto

Die Gautengse departement van onderwys het in ʼn verklaring gesê hy wil ouers aan die sluitingsdatum vir laat aanlynaansoeke herinner.

Volgens die departement is die sluitingsdatum 30 November 2016.

“Ouers word aangemoedig om teen 30 November aansoeke in te dien indien hulle ʼn plek wil verseker vir hul kinders by Gautengse skole,” het Oupa Bodibe, woordvoerder van die departement, gesê. “Die beplanning vir skoolmateriaal soos boeke, skryfbehoeftes, tafels en stoele moet ook gedoen word in ooreenstemming met die aantal leerders in ons stelsel.”

Bodibe het dit benadruk dat geen aansoeke in Januarie geprosesseer sal word nie, aangesien onderrig en leer reeds op die eerste skooldag sal begin.

The Brady Bunch

Florence Henderson, die aktrise wat Carol Brady, die altyd-vrolike ma in die televisiereeks “The Brady Bunch” gespeel het, is oorlede.

Henderson is Donderdag in die ouderdom van 82 oorlede. Haar bestuurder, Kayla Pressman, het gesê Henderson was omring deur haar familie en vriende.

Sy is Donderdagaand by Cedars-Sinai-hospitaal in Los Angeles oorlede nadat sy die dag tevore opgeneem is. Sy het hartversaking gehad.

Henderson was ʼn Broadway-ster voor sy ʼn televisie-ikoon geword het met dié heilsame gesinsprogram. Miljoene kykers het ingeskakel om na die onskuldige sitkom oor ʼn saamgestelde gesin te kyk.

“The Brady Bunch” se eerste episode is in 1969 uitgesaai en dit het gereeld in verskeie gedaantes teruggekeer soos “The Brady Bunch Hour” in 1977, “The Brady Brides” in 1981 en “The Bradys” in 1990.

Henderson is met die teaterhoof Ira Bernstein getroud en vier kinders is uit die huwelik gebore voor hulle ná 29 jaar geskei het. Haar tweede man, John Kappas, is in 2002 oorlede.

Sy word oorleef deur haar kinders Barbara, Joseph, Robert en Lizzie, hul onderskeie eggenote en vyf kleinkinders.

Monique Taute en Henk Maree, AfriForum se verteenwoordigers in die VN

AfriForum het die Suid-Afrikaanse regering se onvermoë en onbereidwilligheid om voldoende hulp aan droogtegeteisterde kommersiële boere in Suid-Afrika te verskaf, aan die groot klok gehang.

Die burgerregte-organisasie het ’n voorlegging oor hierdie onderwerp gedoen tydens die Verenigde Nasies (VN) se negende Forum vir Minderheidsaangeleenthede.

“Die reën wat die afgelope paar weke geval het, is nie voldoende om die nood te verlig nie,” het Henk Maree, woordvoerder vir AfriForum, gesê. “Die realiteit is dat sekere streke jare laas behoorlike reën gekry het. As dit reën, beteken dit ook nie outomaties dat weiding beskikbaar is nie. Selfs gedeeltes waar dit wel gereën het, het tyd nodig om te herstel voordat vee daarop kan wei of dit vir saaidoeleindes gebruik kan word.”

Die voorlegging in Genève, Switserland het ’n skakeltoer wat twee weke lank geduur het, afgesluit. Tydens die toer het verteenwoordigers van AfriForum talle organisasies en parlementslede van die Nederlandse en Belgiese regerings ontmoet om die omvang en verwagte impak van die droogte te bespreek. Sekere organisasies het aangedui dat hulle dit sterk oorweeg om bydraes te maak ten einde verligting vir bedroefde boere te bring.

“Altesaam 38 000 Suid-Afrikaners het reeds hul werk weens die droogte verloor. Basiese produkte soos mieliemeel se prys gaan die hoogte inskiet. Die impak van die droogte van die afgelope paar jaar gaan nog in die voorsienbare toekoms ’n effek op die Suid-Afrikaanse ekonomie hê,” het Maree bygevoeg.

Die perlemoen wat tydens ʼn klopjag op ʼn plaas in Caledon in die Overberg-omgewing gevind is (25 November 2016) Foto: SAPD

Die Wes-Kaapse polisie het Vrydag beslag gelê op perlemoen ter waarde van ongeveer R6,5 miljoen tydens ʼn klopjag op ʼn plaas in Caledon in die Overberg-omgewing.

“Beamptes het vanoggend beslag gelê op 35 891 stukke perlemoen met ʼn geraamde straatwaarde van R6,5 miljoen,” lui ʼn verklaring. “Droogtoerusting is ook gekonfiskeer.”

Daar was nie iemand op die plaas teenwoordig nie, maar die polisie sluit nie die moontlikheid van inhegtenisnemings uit tydens verdere ondersoek nie.

“Ons stryd om misdaad te bekamp wat mariene hulpbronne betref, duur voort.”

Adjunkpresident Cyril Ramaphosa tydens ‘n vergadering in Maart 2015 by die Uniegebou in Pretoria (Foto: departement van kommunikasie)

Die National Union of Metalworkers of SA (Numsa) het Vrydag die vakbondfederasie Cosatu se steun vir adjunkpres. Cyril Ramaphosa om die leisels van die regerende party oor te neem, verwerp.

Maroela Media het vroeër berig Cosatu se sentrale uitvoerende komitee het Ramaphosa die stempel van goedkeuring gegee om as leier van die ANC oor te neem. Cosatu het gesê hy sal ook ʼn veldtog van stapel stuur om ANC-strukture te beïnvloed om hom hierin te ondersteun.

“Numsa het dit reeds genoem dat Cyril Ramaphosa ʼn vyand van die werkersklas is,” het Irvin Jim, algemene sekretaris van Numsa, gesê. “Hy het werkers se swaarverdiende winste aangeval en die belange van die kapitaliste beskerm, waaronder toe hy onlangs wetgewing ondersteun het om armoedelone te beskerm.” Numsa het ook arbeidminister Mildred Oliphant se plan, om beperkings op stakings te plaas, veroordeel.

Bheki Ntshalintshali, Cosatu-sekretaris, het verslaggewers in Johannesburg toegespreek na afloop van ʼn drie dae lange vergadering van die federasie se sentrale uitvoerende komitee. ““Ons is bewus daarvan dat ons nie ʼn stemgeregtigde struktuur van die ANC is nie, maar ons verteenwoordig die werkers wat die lede en ondersteuners van die ANC is,” het Ntshalintshali gesê.

Die ANC-takke sal tydens die party se nasionale konferensie in 2017 pres. Jacob Zuma se opvolger kies. Dit is te midde van toenemende druk op Zuma om uit te tree.

“Ramaphosa het verseker dat daar ʼn eiendomsklousule in die Grondwet is om seker te maak die ekonomie van die land bly in die hande van Suid-Afrika se wit, rassistiese, kapitalistiese, koloniale elite, met ʼn paar swart gesigte soos sy eie om die feit te verbloem dat die status quo gehandhaaf word,” het Jim bygevoeg. “Hy het herhaaldelik die werkersklas se belange aangeval om die kapitaliste te bevoordeel, van wie hy ʼn lid is.”

Cosatu het gesê ondanks die feit dat Ramaphosa in die middel was van die uitval ná die Marikana-slagting, is hy die regte persoon om die ANC se leierskap oor te neem. Numsa het egter gesê as direkteur van Lonmin, word Ramaphosa direk geïmpliseer by die slagting waartydens 34 stakende mynwerkers in Augustus 2012 gesterf het.

Volgens Numsa sal ʼn ANC-regering onder Ramaphosa niks beter wees as die bestaande Zuma-regering nie.

“Ons is meer as ooit seker dat Cosatu stadig maar seker baie gevaarlik geword het en teen die belange van werkers is. Ons kan slegs tot een gevolgtrekking kom: dat Cosatu sy revolusionêre etos verloor het toe hy besluit het om van sy nywerheidproletariaat ontslae te raak.”

Die National Union of Mineworkers (NUM) het in September sy ondersteuning aan Ramaphosa toegeskryf om Zuma as leier op te volg.

Argieffoto: GCIS

Eskom het Vrydag gesê hy neem met spyt kennis van Standard & Poor’s se aankondiging om die maatskappy se langtermyn korporatiewe kredietgradering na rommel- oftewel nie-beleggingstatus af te gradeer.

Die kredietgraderingsagentskap het Eskom se status afwaarts aangepas van BB na hoë risiko (BB+). S&P het gesê hy hou ook die vooruitsig vir Eskom se skuld op negatief.

Standard & Poor’s het gesê die besluit word toegeskryf aan toenemende finansiële druk wat deur Eskom in die gesig gestaar word weens die onduidelikheid oor tariewe as gevolg van die voortslepende hofsaak teen die Nasionale Energiereguleerder van Suid-Afrika (Nersa).

S&P het ook sy kommer uitgespreek oor onsekerheid oor die regering se besluit om die bestaande R350 miljard “raamwerk”-ooreenkoms se beskikbaarheidsperiode te verleng wat volgende jaar Maart tot ʼn einde sou kom.

Anoj Singh, hoof finansiële beampte van Eskom, het egter gesê die kragvoorsiener is vol vertroue dat die huidige proses, om die GFA se beskikbaarheid te verleng, die graderingsagentskap se beswaar sal aanspreek.

Singh het gesê Eskom het finansiering van 86% vir die periode verseker en glo dat dit as versagting sal dien vir enige likiditeitsrisiko’s.

“Dit is duidelik uit die aankondiging dat regulatoriese en tariefsekerheid noodsaaklik is vir Eskom se finansiële volhoubaarheid. Dit is dus noodsaaklik dat die voortslepende hofsaak teen Nersa tot ʼn einde moet kom om ʼn behoorlike tariefregime te bepaal,” het Singh gesê.

Hy het dit benadruk dat die afgradering nie ʼn materiële impak op Eskom se finansieringsplanne vir die finansiële jaar, wat op 31 Maart 2017 eindig, sal hê nie.

Fitch-graderingsagentskap het intussen Suid-Afrika se vooruitsig van stabiel na negatief gewysig as gevolg van politieke risiko’s en beleidsonsekerheid binne die regering, binnegevegte in die ANC en swak ekonomiese groei.

Marlene Hurford in die hospitaal. Foto: Verskaf

Die burgerregte-organisasie AfriForum het sy kommer uitgespreek oor die growwe dubbele standaarde wat toegepas word wanneer daar oor rassistiese voorvalle gerapporteer of in die algemene diskoers daarvan gepraat word. Die organisasie het ook ’n beroep op die regering, media en alle ander rolspelers gedoen om konsekwent te wees in hul veroordeling van alle rassistiese voorvalle.

Ernst Roets, adjunk uitvoerende hoof van AfriForum, het verwys na die kapingsvoorval Woensdag in Rustenburg waartydens Marlene Hurford en Grant Short erg deur drie mans aangerand en met die dood gedreig het. “Nadat Hurford haar gesteelde tablet geblokkeer het, het een van die aanvallers glo die laaste nommer wat sy gebel het geskakel en gedreig: “You white bitch, I’m coming for you’,” het Roets gesê.

Roets het gesê geweldmisdade waar wit mense die slagoffers en swart mense die oortreders is, word nie met dieselfde entoesiasme veroordeel as in gevalle waar swart mense die slagoffers en wit mense die oortreders is nie.

“Dit blyk dat wanneer ’n wit persoon die slagoffer en ’n swart persoon die oortreder is, dit oor die algemeen as ‘gewone misdaad’ afgemaak word. In gevalle waar ’n wit persoon die oortreder en ’n swart persoon die slagoffer is, word dit egter summier as ’n daad van rassisme bestempel.”

Roets wys verder daarop dat daar vanjaar reeds ’n legio sulke voorbeelde was en sê dat die inkonsekwente veroordeling van rassisme nie net neerslag vind in die manier waarop daar hieroor berig word nie, maar ook in die gevolge vir die oortreders.

Penny Sparrow, ’n afgedankte eiendomsagent van KwaZulu-Natal, het in Januarie vanjaar op haar Facebook-blad na swart strandgangers in Durban as “ape” verwys. Die Umzinto-gelykheidshof in Scottburgh het Sparrow weens haatspraak met R150 000 beboet, wat sy aan die Oliver & Adelaide Tambo-stigting moet betaal.

Daarteenoor het Velaphi Khumalo, ’n werknemer by die provinsiale departement van sport, kuns, kultuur en ontspanning, ook in Januarie op sy Facebook-blad gesê dat hy “die land van wit mense wil reinig” en dat daar teen wit mense opgetree moet word soos Adolf Hitler teen die Jode gedoen het. Hy het in ’n tweede inskrywing op Facebook gesê dat wit mense in Suid-Afrika verdien om soos Jode opgekap en doodgemaak te word. Die departement het Khumalo hangende ’n interne dissiplinêre ondersoek met betaling geskors. Hy is nog geen straf deur die gelykheidshof opgelê nie.

Ernst Roets. Argieffoto: Reint Dykema.

In dieselfde week waarin die harebeleid van ’n Pretoriase hoërskool landswyd in die kollig was en veroordeel is weens ’n reël dat meisies nie Afro’s by die skool mag dra nie, het Luvuyo Menziwa, ’n lid van die verteenwoordigende studenteraad (VSR) van die Universiteit van Pretoria, op sy Facebook-blad geskryf dat hy wit mense met ’n bazooka en masjiengeweer wil afmaai. Hoewel hy uit die VSR geskors is, is die interne dissiplinêre ondersoek teen hom stééds nie afgehandel nie.

Uit die manier hoe dié sake hanteer is, lyk dit asof dit ’n nasionale krisis word om vir skoolkinders te sê dat hulle nie Afro’s by die skool mag dra nie, terwyl ’n swart persoon wat sy behoefte uitspreek om wit mense te vermoor, as relatief normaal en alledaags beskou word.

“Hierdie dubbele standaarde is ook sigbaar in die ophemeling van die leiers van die #FeesMustFall-veldtog en die #MustFall-beweging in die breë, terwyl dit algemene kennis is dat verskeie leiers van dié beweging in die openbaar gesê het dat wit mense vermoor moet word en dat Hitler ’n held was,” het Roets gesê.

Hy het bygevoeg dat dit duidelik is dat die opstellers van die ANC se voorgestelde Wetsontwerp op die Voorkoming en Bestryding van Haatmisdade en Haatspraak wit mense wat snedige kommentaar teenoor swart mense maak in die tronk wil gooi, terwyl dieselfde opstellers versuim om dit te veroordeel as swart persone moord of selfs volksmoord op wit mense aanmoedig.

Argieffoto: Fidel Castro

Fidel Castro, die voormalige president van Kuba, is in die ouderdom van 90 in Havana dood.

Sy dood is deur pres. Raul Castro, Fidel se broer, op nasionale televisie aangekondig.

Die voormalige revolusionêre leier sal na verwagting veras word. Pres. Castro het gesê dit is in ooreenstemming met die oorledene se wense.

Fidel Castro het Kuba vir 47 jaar gelei en in 2008 weens gesondheidsredes uitgetree, waarna hy steeds agter die skerms betrokke was by die land se sake.

Li Keqiang, premier van China, groet Kuba se voormalige leier, Fidel Castro, tydens sy tweedaagse besoek aan Kuba op 26 September vanjaar . Foto: AP/Alex Castro

Die brandweer en paramedici op die toneel. Foto: ER24

Inwoners van ʼn woonstelblok in Pietermaritzburg in KwaZulu-Natal het Vrydag ongedeerd daarvan afgekom nadat ʼn brand in die gebou uitgebreek het.

Russel Meiring, woordvoerder van ER24, het gesê die brand het in die woonstelblok op die hoek van Kerk- en Eaststraat in dié stad uitgebreek.

“Paramedici van ER24 en die provinsiale nooddienste is na die toneel ontbied waar die twee boonste verdiepings in ligte laaie gestaan het,” het Meiring gesê. “Brandbestryders het dadelik begin om die brand te blus terwyl paramedici mense wat uit die woonstelblok gevlug het, ondersoek het.”

Volgens Meiring het inwoners nooddienswerkers meegedeel dat daar mense op die boonste verdieping van die gebou vasgekeer was. “Die brandweer het die brand onder bedwang gebring en die twee vloere deursoek. Gelukkig is daar geen persone gevind nie en kon almal daarin slaag om uit die brandende gebou te ontsnap.”

Geen beserings is aangemeld nie. Die oorsaak van die brand is nie bekend nie en word ondersoek.

Die brandweer en paramedici op die toneel. Foto: ER24

Argieffoto: Nico Strydom

ʼn 17-jarige skoolmeisie is Saterdag in die vroeë oggendure in ʼn huis in Limpopo vermoor, in ʼn voorval wat die polisie as “baie wreed” beskryf.

Lt.kol. Moathse Ngoepe, provinsiale polisiewoordvoerder, het gesê die meisie, ʼn gr. 11-leerder aan Mukula High School in die Nsavulani-nedersetting buite Giyani, het alleen in ʼn tweekamerhuis op ʼn erf geslaap toe sy omstreeks 01:00 aangeval is.

“Familielede wat in ʼn ander huis op die erf was, het wakker geword van haar gille. Hulle het ondersoek gaan instel en ʼn man van die toneel sien weghardloop,” het Ngoepe gesê.

“Die meisie kon haar aanvaller aan haar familie beskryf voordat sy huilend en in ʼn plas bloed aan haar beserings beswyk het. Sy is op die toneel dood weens verskeie steekwonde regoor haar liggaam.”

ʼn Mes, wat vermoedelik gebruik is om haar mee te vermoor, is langs haar liggaam gevind.

Die polisie het dadelik na die verdagte begin soek en hom binne ʼn paar uur in hegtenis geneem.

Die motief vir die moord is nog nie bekend nie en word ondersoek.

Die 22-jarige verdagte moet Maandag in die Giyani-landdroshof verskyn op aanklag van moord.

Argieffoto

Adv. Anton Alberts, Die VF Plus se voorsitter, het Vrydag die menseregtekommissie van die Verenigde Nasies (VN) se forum oor minderheidsregte toegespreek oor die situasie rakende regeringsvergrype teen minderheidsregte in Suid-Afrika.

Alberts het breedvoerig uitgespel hoe wetgewing onder die dekmantel van “transformasie” misbruik word om minderhede soos die Afrikaner en die KhoiSan se regte weg te kalwe en nuwe ongelykhede te skep.

Hy het ʼn beroep op die VN se sekretaris-generaal gedoen om ʼn volledige ondersoek na die aangeleentheid te gelas en om druk op die ANC-regering te plaas om die regte van minderhede in die land te eerbiedig.

Alberts het die volgende indrukke oor die dag se verrigtinge gedeel:

• Talle minderhede van regoor die wêreld in verskillende grade van onderdrukking en staatloosheid was teenwoordig. Daar was ʼn sterk verteenwoordiging van minderhede uit die Midde-Ooste waar talle konflikte tans woed.

Verbasend was dat talle minderhede in selfs Europa meer outonomie opeis, soos die Savoye van Frankryk wat hulself nie as Franse beskou nie. Ook Hongare in Roemenië, Roma-minderhede versprei regoor Europa, die inwoners van Triëste in Italië, en die Veneti van Italië (van Venesië).

Chinese minderhede en talle mense in Oosterse lande het hul stemme dik gemaak en dit was skrikwekkend om aan te hoor hoe hul regte misken word. So ook die Koerde, die Yazidi in Irak en die Siriërs.

Daar was verdere voorleggings oor konsentrasiekampe, marteling, verkragting, vroue wat as slawe verkoop word, teregstellings, kindermishandeling en volksmoord. Die Koerde het ook gekla oor hul moeilike posisie in die Midde-Ooste.

• In talle voordragte het verskeie state se verteenwoordigers die sprekers probeer onderbreek om beswaar aan te teken teen die promovering van enige vorm van die versplintering van die betrokke staat waarin die minderhede hulle bevind en selfs ook waar minderhede verskillende vorme van vervolging teen die state genoem het.

Die promovering van afstigting kom gewoonlik voor by minderhede wat onder geweldige onderdrukking is. State soos Suid-Afrika, Iran, Irak, Pakistan, Egipte, Saoedi-Arabië, China, Indonesië, Venezuela, Bolivië, Rusland en Kuba het gereeld die sprekers in die rede geval en onderbreek. Hul argument was óf dat onwaarhede verkondig word, óf dat die sprekers die versplintering van die state kan veroorsaak deur afstigting.

Interessant genoeg was state soos die VSA, Kanada, Oostenryk, Ierland en Swede gekant teen die onderbrekings en het dit duidelik gestel dat minderhede se verteenwoordigers die geleentheid gegun moet word om hulself uit te druk omdat die state wel kans sou kry om daarop te reageer.

In hierdie verband moet veral die VSA uitgesonder word wat telkens die morele leierskap in dié verband geneem het.