Geskiedenis gemaak toe Zimbabwiese eiendom onder hamer kom

Internasionale regsgeskiedenis is Maandag in Kaapstad gemaak toe die eerste eksekusieveiling van ’n Zimbabwiese eiendom in Suid-Afrika plaasgevind het, as ’n regstreekse gevolg van pres. Robert Mugabe se menseregtevergrype in die land.

Dié eiendom, wat in Salisburyweg 28, Kenilworth, Kaapstad geleë is, is aan ’n private bieër vir R3 760 000 verkoop.

Maroela Media het vroeër berig AfriForum het ses jaar gelede begin om Zimbabwiese boere en menseregte-aktiviste in die land by te staan met ’n regstryd nadat Mugabe geweier het om gehoor te gee aan ’n bevel van die SAOG-tribunaal dat sy grondgrype onwettig en rassisties is. Die bevel is in die hooggeregshof in Pretoria geregistreer en AfriForum se prokureurs het vir die eerste keer in Maart 2010 beslag gelê op die eiendom in Kaapstad.

Na onsuksesvolle pogings van die Zimbabwe-regering in die hooggeregshof, die appèlhof en die grondwetlike hof om die registrasie van die uitspraak in Suid-Afrika om te keer, het die balju van Kaapstad vandag voortgegaan met die opveiling van die eiendom op die perseel.

Dit is die eerste keer in die geskiedenis dat ’n uitspraak van ’n menseregtehof in Afrika gelei het tot die verkoop van ’n eiendom van die land wat hom skuldig gemaak het aan menseregtevergrype, op ’n openbare veiling deur die balju.

Die aard van die litigasie tans het ten doel om ’n burgerlike sanksieveldtog teen menseregtevergrype in Zimbabwe op verskeie terreine aan die gang te hou.