Zuma in die parlement. Foto: Twitter
Zuma het in ʼn verklaring gereageer op mediaberigte van twee hofsake teen hom rakende die veiligheidsopgraderings by sy Nkandla-woning en die skikking met die voormalige nasionale direkteur van openbare vervolging, Mxolisi Nxasana.
Die presidensie het gesê dat alle Suid-Afrikaners die reg het om die howe te nader en Zuma respekteer daardie reg. “Die president sal slegs kommentaar lewer op die meriete van die sake op die regte tyd in die hof en sal daarom nie die kwessie in die media bespreek nie uit respek vir die howe,” het die presidensie gesê.
Die leier van die Ekonomiese Vryheidsvegters (EFF), Julius Malema, het Zuma Donderdag gewaarsku dat hy die saak van die R246 miljoen se opgraderings by Zuma se private woning in KwaZulu-Natal sal opvolg. “Dit is baie duidelik dat ons nooit ʼn antwoord uit meneer die president sal kry nie. Kom ons sien mekaar in die hof,” het Malema aan Zuma in die Nasionale Vergadering gesê.
Die drie uur lange vraag-en-antwoord-sessie met die president het in chaos ontaard toe die vraag wanneer Zuma die geld van die Nkandla-opgraderings gaan terugbetaal weer geopper is.
Intussen is daar vroeër berig dat twee nie-regeringsorganisasies die howe sal nader om die R17 miljoen-skikkingsooreenkoms tussen Nxasana en Zuma ongeldig te laat verklaar. Die presidensie het in Mei aangekondig dat Nxasana sal uittree nadat hy en Zuma ʼn ooreenkoms aangegaan het.