Drie vas oor dwelms

Drie buitelanders is in Bellville naby Kaapstad in hegtenis geneem vir die beweerde besit van dwelms, het die Wes-Kaapse polisie gesê.

Konst. Noloyiso Rwexana, woordvoerder van die polisie, het gesê polisiebeamptes het Saterdagoggend inligting opgevolg oor dwelmaktiwiteite by Parksig Villas in Bellville.

“Drie verdagtes, almal buitelanders tussen die ouderdomme van 29 en 36, is in hegtenis geneem. Daar is op verskeie dwelms, insluitend tik, dagga en kokaïen beslag gelê.”

Volgens Rwexana sal die verdagtes na verwagting Maandag in die Bellville-landdroshof verskyn op aanklag van die besit van dwelms.