Die sakeregtewaghond AfriSake het vandag regstappe teen Eskom ingestel, nadat Tegeta Explorations & Resources ʼn R4 miljard kontrak met Eskom losgeslaan het om die Majuba-kragstasie vir die volgende 10 jaar van steenkool te voorsien.
Argieffoto
Dit kom skaars ʼn week nadat AfriSake, in ’n ander saak, ’n aansoek ingevolge die Wet op die Bevordering tot Toegang tot Inligting (PAIA) aan Eskom gerig het oor miljoene rande se bonusse wat aan die elektrisiteitverskaffer se topbestuur uitbetaal is.
Tegeta Explorations & Resources het die kontrak na bewering vir die vyfde keer gekry, ondanks die feit dat dit in 2011 verwerp is weens die swak gehalte van die steenkool. Ná die ondertekening van die kontrak is vier senior werknemers – wat die gehalte van die steenkool bevraagteken het – na bewering geskors.
“Juis omdat daar sprake is van korrupsie en oneerlikheid én omdat Eskom politieke bande met die ANC het, behoort so ʼn kontrak nie onderhandel te word nie. Belastingbetalers se geld word gebruik, daarom moet ʼn maatskappy soos Eskom ten alle tye onbesproke en deursigtig optree,” het Stefan Pieterse, AfriSake se nasionale woordvoerder, gesê.
AfriSake se regstappe behels die aanvra van die volgende inligting van Eskom:
• ʼn Lys van alle kontrakte tussen Eskom en Tegeta Explorations & Resources;
• ʼn Lys van tenderaars wat vir die kontrak aansoek gedoen het;
• Skriftelike redes waarom die kontrak aan Tegeta Resources toegeken is;
• ʼn Agenda van die vergadering waar die tender bespreek is;
• Die notule en resolusie waar die tender goedgekeur is;
• Vorige analiseverslae oor Tegeta Explorations se steenkoolgehalte.
“Eskom het 30 dae om die inligting aan AfriForum te verskaf. Indien hulle dit nie doen nie, is ʼn interne appèl ons volgende stap,” het Pieterse gesê.