Ramaphosa: ‘Negatiwiteit is nasionale sport in SA’

Negatiwiteit is vir Suid-Afrikaners ʼn nasionale sport ten spyte daarvan dat die land verskeie verbeteringe op maatskaplike, ekonomiese en politieke gebiede toon, het adj.pres. Cyril Ramaphosa Vrydag gesê.

“Ek het die ander dag in die parlement gesê ons het die afgelope 30 dae geen beurtkrag gehad nie. In plaas daarvan dat dit gevier word, gooi mense koue water daaroor uit. Dit het ʼn nasionale sport onder Suid-Afrikaners geword. Ons put genot daaruit dat alles verkeerd loop,” het Ramaphosa op die nasionale raad vir ekonomiese ontwikkeling en arbeid (Nedlac) se jaarlikse beraad in Pretoria gesê.

“Ons is ʼn nasie wat onsself vermink. Ons sny onsself in stukke en kyk heeltyd na al die negatiewe. Ons kyk nooit na die positiewe nie. Self wanneer Eskom probeer om vir 30 dae beurtkrag uit die land te hou, sê ons ‘dis nie belangrik nie’. Ons kyk na alles uit ʼn negatiewe perspektief. Dis tyd dat ons positief raak. Ons moet nie net onsself lief hê nie, maar ook ons land liefhê en ʼn paar van die positiewe goed wat aan die gang is, raaksien.”

Ramaphosa het gesê die Nedlac-beraad wat ʼn samekoms van die regering, arbeid en die sakebedryf is, moet Suid-Afrikaners hoop gee.

“Nedlac moet ʼn handelaar van hoop wees. Hierdie Nedlac-beraad moet ʼn beraad wees wat hoop kweek. Ons moet hoop aan ons mense gee. Dit is ʼn forum wat alle sektore van ons ekonomie kombineer. Hier moet voorstelle gegee word van praktiese goed wat ons kan doen wanneer ons vandag hier wegstap. Ons moet buitengewone goed doen in tye van buitengewone uitdagings om buitengewone geleenthede aan te gryp,” het Ramaphosa gesê.

Bheki Ntshalintshali, waarnemende hoof van Cosatu, het sy toespraak gebruik om oor die polisiesterftes in Suid-Afrika te praat. “Hoewel dit lyk asof hierdie aanvalle op die polisie is, is dit eintlik op ons gemeenskappe gemik. Dit het ten doel om vrees aan te wakker onder diegene wat ons gemeenskappe moet beskerm. Wanneer dit bereik is, sal dit oorspoel na die wyer bevolking en sal die oerwoudwet van oorlewing van die sterkste seëvier,” het Ntshalintshali gesê.

“Waar het jy gesien dat polisie deur misdadigers gejaag, vasgekeer en doodgemaak word, behalwe in ons geval? Ons dink hierdie saak moet nou aandag kry.”

Vroeër vandeesweek het pres. Jacob Zuma polisiebeamptes aangemoedig om hulself teen misdadigers te verdedig. Altesaam 58 polisiebeamptes het hierdie jaar al gesterf in misdaadverwante aksies.