Zuma: ‘Polisie sal versterk word om terug te baklei’

Pres. Jacob Zuma het Sondag gesê hy het opdrag gegee dat die polisie met die nodige toerusting en vaardighede toegerus word om misdaad te beveg, maar ook hulself te beskerm.

Zuma het tydens ʼn geleentheid ter herdenking van polisiebeamptes wat aan diens dood is by die Uniegebou in Pretoria gepraat. Vanjaar is altesaam 58 polisiebeamptes doodgemaak terwyl hulle aan diens was, van wie 19 in Gauteng.

Volgens Zuma is enige aanval op die polisie ook ʼn aanval op die regering en sy gesag. Hy het die versekering gegee dat die polisie “versterk” en maatreëls toegepas sal word wat onmiddellik van krag word en die polisie in staat sal stel om “met mag terug te baklei” wanneer hul lewe bedreig word.

“Terselfdertyd moet die polisie te alle tye binne die wet optree en uitermatige geweld vermy,” het hy bygevoeg.