UK-student se liggaam vermoedelik gevind

ʼn Liggaam, vermoedelik dié van ʼn student van die Universiteit van Kaapstad wat Sondagaand in die see by Koffiebaai in die Oos-Kaap verdwyn het, is Vrydag opgemerk.

Lt. Khaya Tonjeni, woordvoerder van die polisie, het gesê die liggaam is opgemerk ongeveer 5 km van die plek waar die student glo geswem het. Die liggaam is omstreeks 14:30 opgemerk tydens ʼn soektog deur die polisie se soek-en-reddingspan en ʼn private helikopter.

Die 19-jarige Amerikaanse student het Sondagaand omstreeks 23:00 saam met vyf ander vriende gaan swem toe hy in die golwe verdwyn het. ʼn Ure lange soektog deur die SA Lugmag, die Nasionale Seereddingsinstituut, die polisie se duikeenheid en die Oos-Kaapse rampbestuureenheid was tevergeefs.

“’n Helikopter is na die toneel gestuur waar die liggaam vanmiddag [Vrydag] gesien is om te help om dit uit die water te haal. Die reddingspan sal ons deurentyd op hoogte hou van die verwikkelinge,” het Tonjeni gesê.