Seksklagtes teen modelbaas: ‘Hulle maak stories op’

Dawie de Villiers, die Johannesburgse modelbaas wat tereg staan op verskeie aanklagte wat verkragting, seksuele aanranding en die besit van kinderpornografie insluit, het Woensdag in die hof gesê almal wat teen hom getuig het “lieg en maak stories op”.

Arveena Persad, die staatsaanklaer, het De Villiers onder kruisverhoor gevra of hy dink die getuies lieg. “Ja, hulle het gelieg en maak net stories op,” het De Villiers gesê. “Ek is die enigste eerlike een.”

Regter Cassim Moosa het De Villiers gevra om kommentaar te lewer op sommige van die getuienis teen hom, wat e-posse waarin De Villiers betrek word by beweerde bedrog van R200 000, insluit. De Villiers het ontken hy het die e-posse geskryf en gesê hulle is deur sy sakevennoot geskryf.

Moosa het De Villiers ook uitgevra oor die emosionele toestand van een van die vroue wat teen hom getuig het. “Sy het toneel gespeel. Ek het al met akteurs gewerk wat net kan huil en dan dadelik weer ophou. Niemand sal kan huil en dan net so ophou soos wat sy het nie,” het De Villiers gesê.

De Villiers staan tereg op aanklagte van seksuele aanrading, verkragting, die besit van kinderpornografie, seksuele gereedmaking van ʼn kind en bedrog. Die verhoor duur voort.