Carmen Botha. Foto: Verskaf
Enkele dae nadat Carmen Botha, die tiener van Centurion wat 15 meter ver van ʼn glykabel af geval het, na ʼn rehabilitasiehospitaal oorgeplaas is, is sy weer terug in die waakeenheid van ʼn Johannesburgse privaathospitaal.
Gerna Botha, Carmen se ma, het Woensdag aan Maroela Media gesê Carmen is verlede week, na meer as twee maande in die hospitaal, na die Netcare Rehabilitasiehospitaal in Aucklandpark oorgeplaas vir intensiewe fisio- en arbeidsterapie. Sy was egter slegs twee dae daar voordat sy Vrydag teruggeneem is hospitaal toe weens ʼn obstruksie in haar dunderm.
“Die littekenweefsel wat gevorm het weens vorige chirurgie in haar buik, het ʼn soort obstruksie in die derm gevorm, wat veroorsaak het dat die derminhoud nie dreineer nie. Hulle het aanvanklik probeer om dit met medikasie te behandel, maar moes noodgedwonge Dinsdag opereer om die obstruksie te herstel en die littekenweefsel in die buik weg te sny,” het Gerna verduidelik.
Sy het gesê Carmen is vir eers terug in die waakeenheid totdat die derm weer self funksioneer. Intussen word die vloeistof uit haar maag dreineer met ʼn pyp deur haar neus.
Carmen is in Januarie kritiek beseer toe sy by ʼn skoolkamp van ʼn glykabel (foefie-slide) afgeval het. Haar lewer en milt is geskeur, van haar ribbes is gebreek en het deur haar long gesteek, twee van haar werwels is gebreek, ʼn bloedvat in haar dermkanaal het geskeur en sy het ʼn haarlynfraktuur aan haar skedel opgedoen.
Na ʼn rugoperasie en baie fisioterapie, is Carmen steeds in haar onderlyf verlam, maar volgens Gerna kry dit haar nie onder nie. “Sy het ongelooflik baie deursettingsvermoë en dit is nog lank nie die einde van ons pad nie,” het sy gesê.
“Die neurochirurg wat haar behandel, sê hy kan geen rede sien waarom sy nie sal kan loop nie, dus weet ons baie gaan nog oor die volgende jaar en daarna verander. Die dokters meen ons sal oor twee jaar kan sê, ‘Goed, dit is so goed as wat sy gaan herstel.’ Tot dan kry sy fisioterapie om haar te leer om so onafhanklik as moontlik te wees met haar gestremdheid, totdat sy weer kan loop.”
Gerna het gesê Carmen se 16 weke-program in die rehabilitasiehospitaal is nou met sowat 10 tot 14 dae uitgestel, totdat sy van haar dermoperasie herstel het. Daarna sal sy weer na die rehabilitasiehospitaal oorgeplaas word waar sy nie net terapie sal ontvang nie, maar ook kan begin om van haar agterstallige skoolwerk in te haal.