Adjunkpresident Cyril Ramaphosa. Foto: Siyabulela Duda, departement van kommunikasie
Adjunkpres. Cyril Ramaphosa word Saterdag as die eerste kanselier van die Universiteit van Mpumalanga ingehuldig.
Die presidensie het in ʼn verklaring gesê die inhuldiging word in Witrivier gehou.
“Die universiteit het tans drie fakulteite in sake en bestuur, landbou- en natuurwetenskappe en opvoedkunde,” het Ronnie Mamoepa, woordvoerder van die presidensie, gesê. Die fakulteite geesteswetenskappe (taal en sosiale wetenskappe), gesondheidswetenskappe en ingenieurswese word in die nabye toekoms ingestel.
Van die gaste wat na die inhuldigingseremonie genooi is, sluit in voormalige pres. Kgalema Motlanthe, ministers Blade Nzimande en Thulas Nxesi en adjunkministers Mduduzi Manana, Nomaindia Mfeketo, Bheki Cele en Mcebisi Skwatsha.
Die universiteit is in 2014 gestig en sal na verwagting vinnig groei in die volgende paar jaar wanneer die infrastruktuur ten volle ontwikkel is.
