Reddingswerkers buite die metrotreinstasie in Brussel ná ‘n ontploffing op 22 Maart 2016 (APTN via AP)
Militante van die Islamitiese Staat is verantwoordelik vir die bomontploffings Dinsdagoggend in Brussel, België, het die ekstremistiese groep se Amaq Agency gesê.
Amaq, een van die groep se multimedia-instansies, het gesê “vegters van die Islamitiese Staat” het in Zaventen-lughawe skote gevuur voor selfmoordgordels afgegaan het. Een van die selfmoordbomplanters het die Maelbeek-metrostasie geteiken.
Die kort verslag, wat eerste op Amaq se Engelstalige webwerf gepubliseer is, beskryf België as “ʼn land wat deelneem in die internasionale koalisie teen die Islamitiese Staat”.
Intussen het die uitvoerende hoof van die lughawe in Brussel gesê die lughawe bly Woensdag ook gesluit.
Die openbarevervoernetwerk het intussen ook weer begin werk. Een tremlyn en 11 buslane het omstreeks 16:30 (plaaslike tyd) weer bedrywighede hervat, het die operateur STIB gesê. Alle ander ondergrondse trein-, trem- en buslane bly gesluit.
België se krisissentrum het intussen gesê persone hoef nie meer binnenshuis te bly nie.
Volgens die krisissentrum is ongeveer 230 persone in die terreuraanvalle by die lughawe en metrostasie beseer, volgens die Belga-nuusagentskap. Minstens 31 persone is dood.
Lees alle vorige berigte oor die Brussel-aanvalle op Maroela Media.