Argieffoto
Twee mans is Vrydag in die vroeë oggendure in hegtenis geneem vir die moord op Sam van der Westhuizen (78) van Aliwal-Noord in die Oos-Kaap.
Kapt. Ursula Roelofse, polisiewoordvoerder, het gesê die twee verdagtes, onderskeidelik 37 en 47 jaar oud, is omstreeks 03:25 by hul onderskeie huise in Dukhatole en Joe Gqabi in hegtenis geneem.
“ʼn Taakspan met speurders van die Aliwal-Noord-polisie, misdaadintelligensie-eenheid en honde-eenheid het sedert Van der Westhuizen se moord alle leidrade opgevolg en ʼn deurbraak is gemaak,” het Roelofse gesê.
ʼn Selfoon, ʼn .22-geweer en verskeie huisware wat uit Van der Westhuizen se huis gesteel is, is in hul besit gevind. Die twee mans sal Maandag in die dorp se landdroshof verskyn op aanklag van moord.
Maroela Media het Dinsdag berig Van der Westhuizen, ʼn wewenaar wat alleen gebly het, se liggaam is Sondagaand op die vloer van sy slaapkamer aangetref. Hy het sigbare wonde aan sy bolyf en kop gehad. Sy liggaam is deur sy bure gevind. Sy bure het bekommerd geraak en gaan ondersoek instel nadat hulle sedert Saterdag geen teken van hom gesien het nie. Hy is Saterdag laas lewend gesien toe hy in die dorp rolbal gespeel het.
Brig. Lawrence Soekoe, die streek se bevelvoerder, het die betrokke beamptes bedank vir hul goeie werk.