Conrad Liebenberg. Foto: Facebook
Conrad Liebenberg (24) wat Woensdagoggend in ʼn restaurant in die ooste van Pretoria geskiet is, se toestand is stabiel maar steeds kritiek.
Liebenberg se vrou, Lalucia van Niekerk, het Donderdag aan Maroela Media gesê Liebenberg word nog in die ongevalle-eenheid van die Steve Biko-hospitaal behandel nadat hy Woensdag omstreeks 08:00 deur ʼn onbekende man in die borskas geskiet is.
“Die koeël is regdeur sy regterbors. Dit het nie sy long getref nie, maar wel ʼn paar are,” het Van Niekerk gesê. “Sy dokters het toetse gedoen om te bepaal of daar infeksie is en ons behoort vandag te hoor of hy geopereer moet word.”
Van Niekerk het gesê haar man is deurmekaar en sy is ook nog nie baie besoektyd by hom toegelaat nie. “Daar is nog baie min duidelikheid oor wat presies gister daar gebeur het,” het sy gesê.
Ao. Dave Miller, woordvoerder van die Garsfontein-polisie, het Woensdag die skietvoorval by die O Sole Mio-restaurant by die Kimiad-gholfbaan in Moreletapark aan Maroela Media bevestig. Liebenberg werk sedert Mei by dié restaurant as algemene bestuurder.
“ʼn Onbekende man het omstreeks 08:00 by die restaurant ingestap en ʼn skoot afgevuur wat die slagoffer bo in sy borskas getref het,” het Miller gesê. Die skieter het gevlug sonder om iets te steel.
Liebenberg het glo voordat paramedici van Netcare 911 hom na die hospitaal geneem het aan omstanders gesê die skieter het vir hom geskreeu dit dien as ʼn waarskuwing vir die restaurant se eienaar.
Liebenberg en Van Niekerk is drie jaar lank getroud en het twee dogtertjies. Die egpaar woon in Elarduspark. Van Niekerk beskryf haar man as ʼn saggeaarde mens wat besonder familie-georiënteerd is. Sy het almal bedank wat hulle deur die moeilike tyd bystaan.
Miller het Donderdag aan Maroela Media gesê niemand is nog in verband met die skietery in hegtenis geneem nie. Die ondersoek duur voort.