Argieffoto.
Altesaam ses mense is Sondag in verskeie botsings in KwaZulu-Natal dood.
Volgens Zinhle Mngomezulu, woordvoerder van die KwaZulu-Natalse Padverkeersinspektoraat, is een mens in Edendale naby Pietermaritzburg dood, toe ʼn motor omgeslaan en gerol het.
ʼn Ander mens is op die R617 naby Mendel dood toe ʼn motor omgeslaan het. Nóg ʼn motor het op die N3 naby Hammarsdale tussen Durban en Pietermaritzburg omgeslaan en die lewe van een mens geëis.
In Pietermaritzburg is ʼn man tydens ʼn tref-en-trap-voorval in Kerkstraat doodgery.
Die ander twee mense is dood in ʼn trompop-botsing op die R61 naby Glenmore Beach, suid van Margate.