Nazi-vlae wat op die toneel in Bothasig, Kaapstad gevind is Foto: African News Agency
Die Suid-Afrikaanse Polisiediens het ʼn wenk ontvang en vuurwapens, ammunisie, weermagtoerusting en Nazi-vlae in Bothasig, Kaapstad, gevind.
“Die provinsiale ondersoekeenheid is na ʼn huis in Vryburgerstraat nadat hulle ʼn wenk van die publiek ontvang het,” het die polisie Vrydag gesê. “Die beamptes het omstreeks 11:40 die woonstel agter die huis betree en beslag gelê op twee vuurwapens, twee knaldempers, ʼn teleskoop, verskeie magasyne en ʼn groot aantal ammunisie van verskeie kalibers, insluitend R1’s, R5’s, 9mm en .45’s.”
Volgens die polisie het beamptes ook weermag-, opleidings- en herlaaitoerusting, asook Nazi-vlae en -memorabilia gekonfiskeer.
“Alhoewel niemand in hegtenis geneem is nie, is ʼn persoon van belang geïdentifiseer,” lui die verklaring. “Die besonderhede van al die items sal bekend gemaak word sodra speurders die ondersoek op die toneel afgehandel het.”
