Vanderbijlpark-moorde: ‘Dwelmbase het my gedwing om hulle te skiet’

Fanie du Preez (39), die man wat aangekla word van die moorde op sy vrou en twee kinders, is Dinsdag borgtog in die Vanderbijlpark-landdroshof geweier.

Thea (41) en haar kinders, Carlia (17) en Phillip (14), is in die vroeë oggendure van 3 Desember in hul beddens doodgeskiet. Du Preez het aanvanklik beweer hy was in die motorhuis besig toe hy skote in die huis gehoor het. Hy het beweer hy is daarna deur twee gewapende verdagtes gekonfronteer wat op vlug geslaan het, waarna hy ondersoek gaan instel en sy gesin se liggame in die huis aangetref het.

Volgens Jacques Steenkamp, van SAUK-radionuus, het Du Preez Dinsdag sy weergawe van die gebeure verander en in die hof aangevoer twee Nigeriese dwelmbase het hom met ʼn vuurwapen gedreig en gedwing om sy gesin dood te skiet, nadat hy geweier het om dwelms namens hulle te verkoop. Die hof het ook gehoor Du Preez het sy weergawe van die gebeure aan die polisie drie keer verander.

Thea, Carlia en Phillip is Vrydag uit die River of Life-kerk in Vanderbijlpark begrawe. Du Preez sal teregstaan op aanklagte van moord, die onwettige besit van ʼn vuurwapen en dwarsboming van die gereg wanneer hy op 26 Januarie weer in die hof verskyn.

Lees alle vorige berigte oor die Vanderbijlpark-moorde op Maroela Media.