Argieffoto
Nagenoeg 2 200 gevangenes by die Grootvlei-gevangenis in Bloemfontein word deur ʼn watertekort geraak nadat die gevangenis se watertoevoer Donderdagaand “drooggeloop” het.
“Watertenks en emmers is aan die gevangenis verskaf om aan die gevangenes se minimale waterbehoeftes te voldoen nadat ʼn hoofwatertoevoerpyp gebars het,” het die Vrystaatse departement van korrektiewe dienste in ʼn verklaring gesê.
Die departement het gesê die hoeveelheid water wat verskaf word, kan slegs gebruik word vir basiese higiëne, die voorbereiding van voedsel, om gedrink te word en om medikasie te neem.
“Die departement van openbare werke is op die perseel en besig om die gebarste pyp reg te maak. Gevangenes is ook oor die situasie ingelig en versoek om geduldig te wees totdat die probleem opgelos is.”