Gewapende rooftog buite Vrystaatse dorp op kamera vasgevang

Niemand is nog in hegtenis geneem in verband met ʼn gewapende rooftog verlede week buite Villiers in die Vrystaat wat op kamera vasgelê is en waarvan die foto’s wyd op sosiale media versprei word nie.

Sers. Sikiswa Matoti, woordvoerder van die polisie, het aan Maroela Media bevestig dat ʼn saak van gewapende roof deur die polisie ondersoek word nadat ʼn motoris op die R103 ongeveer 10 km buite die dorp beroof is.

Foto’s van die roof wat deur die voertuig se paneelbordkamera vasgevang is, is die afgelope week wyd op sosiale media versprei. Sosialemedia-gebruikers het bespiegel oor die omstandighede en slagoffer van die rooftog, asook die vuurwapens wat deur die rowers gebruik word.

Op die foto’s kan gesien word hoe die verdagtes R5-aanvalsgewere op die bestuurder van die voertuig rig. Verskeie bewerings is gemaak dat die vuurwapens deur die polisie of die weermag uitgereik moes gewees het, maar die polisie kon dit nie bevestig nie.

Volgens Matoti is ʼn voertuig verlede Woensdag omstreeks 09:50 deur twee ander voertuie, ʼn Audi en ʼn VW Polo, voorgekeer. Matoti kon nie bevestig of die slagoffer se voertuig ʼn motor of ʼn vragmotor was nie. “Vier mans het uitgeklim en R5-aanvalsgewere op die bestuurder gerig. Hulle het met twee sakke, twee selfone en R1 000 gevlug,” het sy gesê. Die bestuurder is nie in die voorval beseer nie.

Matoti het gesê niemand is tot dusver in hegtenis geneem nie en die polisie is steeds besig met hul ondersoek. Sy kon nie bevestig of die foto’s van die verdagtes wat deur die paneelbordkamera vasgevang is in die polisie se besit is nie.