Argieffoto
Die Apel-polisie in Limpopo ondersoek ʼn saak van moord nadat die liggaam van ʼn man, wat glo met klippe doodgegooi is, Dinsdag in ʼn pad gevind is.
Volgens lt.kol. Malesela Ledwaba, polisiewoordvoerder, het die voorval in die dorpie, Machakaneng naby Atok, plaasgevind.
“Die oorledene het vermoedelik Dinsdag in die vroeë oggendure die deur van ʼn 35-jarige vrou se huis oopgeskop voordat hy probeer het om haar te verkrag,” het Ledwaba gesê. “Die vrou het om hulp geskreeu. ʼn Groep gemeenskapslede het gereageer en glo die reg in eie hande geneem en hom gestenig.”
Niemand is nog in verband met die voorval in hegtenis geneem nie. Die ondersoek duur voort.