SA kry vroulike president (vir ʼn dag)

Suid-Afrika gaan vir ʼn kort periode ʼn vroulike president hê.  Susan Shabangu, minister in die presidensie verantwoordelik vir vroue, sal as waarnemende president van die Republiek optree in die afwesigheid van president Jacob Zuma en adjunk-president Cyril Ramaphosa.

Shabangu is Woensdag deur hoofregter Mogoeng Mogoeng by die Grondwethof ingesweer, het die presidensie in ʼn verklaring gesê.

Zuma is in Nieu-Delhi, Indië vir die derde Indië-Afrika-Forumberaad. Die beraad sal Vrydag tot ʼn einde kom.

Intussen is Ramaphosa op ʼn drie-nasie toer van Swede, Kuba en Mexiko. Hy is tans by die Open Government Partnership Global Summit in Mexiko City wat vandag sal afsluit.