Argieffoto ter illustrasie Foto: designerpoint, Pixabay
Kol. Ronel Otto, woordvoerder van die polisie, het gesê vyf mans het met ʼn trop honde op ʼn wildsplaas in die Namakgale-gebied buite Phalaborwa gaan jag. Hulle was omstreeks 18:00 te voet in die veld, toe hulle skielik deur twee leeus bestorm is.
“Drie van die mans kon daarin slaag om betyds in ʼn boom te klim, terwyl die vierde weggehardloop het. Die vyfde man en twee van die honde is egter deur die leeus verskeur,” het Otto gesê. Dit is nie duidelik hoeveel honde die mans by hulle gehad het nie. Die mans het nie vuurwapens by hulle gehad nie en het slegs met die honde gejag, het sy gesê.
Otto het gesê die oorledene is die 24-jarige Matome Mahlale. “Die leeus is die eiendom van die eienaar van die wildsplaas. Die drie mans in die boom kon uiteindelik vlug toe die leeus weggeloop het.”
Volgens Otto is niemand nog in verband met die voorval in hegtenis geneem nie. Die vier mans sal egter aangekla word van onwettige jag en die onregmatige betreding van privaat grond. ʼn Geregtelike doodsondersoek is intussen begin.