Foto: ER24
ʼn Babaseuntjie is dood en drie mense beseer nadat ʼn motor en ʼn bakkie Woensdagoggend op die N14 in Centurion gebots het.
Russel Meiring, woordvoerder van ER24, het gesê met paramedici se aankoms op die toneel op die snelweg naby die Eeufeesweg-afrit in Thaba Tshwane het die twee voertuie in die linkerbaan gestaan. ʼn Vrou was in die agterkant van die motor vasgekeer.
“Die vrou het haar seuntjie, vermoedelik een jaar oud, vasgehou. Paramedici het die baba ondersoek en gevind dat hy geen tekens van lewe toon nie,” het Meiring gesê. Hy het gesê paramedici het alles in hul vermoë gedoen om die baba by te bring, maar dit was tevergeefs en die seuntjie is later dood verklaar.
Die ma en twee mans is op die toneel vir matige tot ernstige beserings behandel voordat hulle na die Kalafong-hospitaal geneem is.
Die polisie sal die oorsaak van die ongeluk ondersoek.