‘n Skermskoot van die plasing. Foto: Facebook.
ʼn Jong vrou van Brackenfell in die Wes-Kaap is in die sop ná ʼn inskrywing wat sy Maandag op Facebook geplaas het.
Die vrou het in ʼn inskrywing op Facebook beweer sy het Maandag oudergewoonte ʼn parkie naby haar huis in die Proteahoogte-omgewing besoek.
“Twee swart mans het op ʼn bankie gesit. Ek het verby hulle geloop en onder ʼn boom gaan sit. Toe ek weer sien, het hulle weggeloop. Vyf minute daarna het hulle van agter af gekom en een het my kop teen die boom vasgestamp. Hy het my opgetel en ʼn skerp voorwerp teen my keel gehou en gesê as ek ʼn geluid maak sal hy my lewe neem,” het die inskrywing gelui.
Sy voer aan dat hulle haar deursoek het vir haar selfoon, maar dat sy dit tuis gelos het.
“Hy het sy houvas op my begin verloor en ek het gedink dit is my kans om te vlug. Soos ek weggeruk het, het hy my aan die kant van my kop gesteek. Ek het baie bloed verloor terwyl ek huis toe gehardloop het. Ek is so dankbaar niks erger het gebeur nie.”
Die vrou gee dan ʼn beskrywing van die twee aanvallers, en noem dat daar ʼn lasbrief vir hul inhegtenisneming uitgereik is. Die plasing is ook vergesel deur ongeveer vyf of ses foto’s van haar bebloede gesig en hande.
“Hulle verdien nie om te lewe nie. Dit maak my so kwaad dat hulle ʼn meisie wat haarself nie kan verdedig nie aanval.”
Die vrou dui op haar Facebook-profiel aan dat sy 20 jaar oud is, maar volgens die polisie is sy 17 jaar oud. Maroela Media maak dus nie haar naam bekend nie, omdat minderjariges volgens wet nie geïdentifiseer mag word nie.
Lt.kol. Andre Traut, woordvoerder van die polisie, het aanvanklik Dinsdag aan Maroela Media gesê ʼn saak van poging tot roof en aanranding word ondersoek nadat ʼn meisie na bewering Maandag omstreeks 11:00 in Hibiscusweg in Proteahoogte deur twee verdagtes aangeval is.
Traut het egter Woensdagoggend gesê die jong vrou is Dinsdagmiddag in hegtenis geneem op aanklag van dwarsboming van die gereg nadat daar deur ʼn polisieondersoek vasgestel is haar aantyging was vals. “Die ondersoek duur voort,” het hy gesê.
Die vrou se plasing is intussen van Facebook verwyder.