Die swaarvoertuig wat gebots het. Foto: ER24
Die bestuurder van ʼn swaarvoertuig is Maandag in ʼn ongeluk op die N3-snelweg naby Hammersadel in KwaZulu-Natal dood.
Werner Vermaak, woordvoerder van ER24, het gesê die ongeluk het omstreeks 04:00 in die rigting van Pietermaritzburg plaasgevind.
“Met paramedici se aankoms is die swaarvoertuig aan die kant van die snelweg, halfpad teen ʼn steilte af, aangetref,” het Vermaak gesê. “Die bestuurder van die vragmotor, in sy 30’s, is dood buite die vragmotor aangetref. Dit is in dié stadium nie duidelik of hy uit die vragmotor geslinger is, of uit die voertuig gespring het voor dit gebots het nie.”
Dit is nog nie bekend wat tot die ongeluk gelei het nie. Die polisie ondersoek die voorval.