Argieffoto: Netcare 911
Twee mense is dood en twee kritiek beseer nadat ʼn motor Woensdagaand teen ʼn swaarvoertuig gebots het.
Santi Steinmann, woordvoerder van Netcare 911, het Donderdag gesê die botsing het op die R82 in Eikenhof, suid van Johannesburg, plaasgevind.
“Volgens inligting van die toneel het die vragmotor regs in die R82-pad ingedraai toe die motor onder die sleepwa ingery het,” het Steinmann gesê.
Met die paramedici se aankoms het hulle die motor se wrak vasgepen onder die sleepwa aangetref.
“Twee mans was reeds dood. ʼn Vrou en ʼn kind is in ʼn kritieke toestand aangetref. Al vier mense moes deur die brandweer uit die motor se wrak gesny word.”
Die vrou is met ʼn helikopter na ʼn hospitaal geneem vir dringende behandeling. Die kind is met ʼn ambulans na ʼn hospitaal gehaas.
Die bestuurder van die vragmotor is ongedeerd.
Omstandighede rondom die ongeluk word ondersoek.